پەڵکەرەنگینەی هۆنراوەیەک

ئەو کتێبەی شەیتان لە ڕۆژی یەکەمی هەفتەکەدا
لە چاوی سووری ئەستێرە شینەکەدا
بۆ ئادەمی ئەگرتەوە
کتێبێ بوو: نەهێنیی بەهەشتی لە خوا
نەشاردەوە
دارسێوی نەکرد بە ژاڵە
لە کانیی ناو دەم و مەمکی ڕوونی «حەواشخصی»
نەخواردەوە
بەڵام، ئەنجام ڕیسواش کرا!
لەگەڵ بوونما، گەرای مردنیشم پێ بوو
ڕێی گۆڕەکەم:
لە بێشکەوە چاوم لێ بوو
ئەمرم بۆ ئەوەی ببمەوە
جارێکی تر بۆ ناو لانکەی
- بوون - بچمەوە!
باران، لە ژانی بەخشینی هەوردایە
گەنم، لە زامی هاوینی زەویدایە
سەربەستی لە: کفنی مەرگی شەهیدایە
وشەش لای من:
لە ڕاچەنینی ئازاری ڕاستیدایە.
لەسەر بانی دەممانەوە
دەزووی چاومان،
بە پشتاوپشت
بۆ کۆلارەی درۆکانمان بەرەڵڵا کرد
دەزوو پچڕا
کۆللارەمان لەسەر تووتڕک گیرسایەوە
دەم و دانیشمان لە حەوشەی
خەڵکی ترا، هێنایەوە.
وتیان: پلەی تەرمۆمەتری
گەرمای شاری سلەیمانیمکان
لە سەرمانا
لەناو خانەی سفرا ئەگریی.
بەتەنیا من لەو کاتەدا
لەناو ژووری مەمکەکانیا
گەرمام بۆ خانەی سەدهەمی
تەرمۆمەتری لەشم ئەفڕی.
ناونیشانمان:
شاری: پارە.
گەڕەک: دەهۆڵ.
شەقام: تەڵە.
کار: مامۆستای وانەی هەڵە.
قوتابخانە: باوکی درۆ.
ئارەزوو: پاشقول لێگرتن،
لەگەڵ ڕیا گۆڕینەوە
تەمەن: بەقەد مننارەکە.
تەلەفونمان بەهۆی «بەددالەی» کەڕەوە
ناوی تەواو: شەممەی کوڕی یەکشەممەی، دووی
سێی، چواری، پێنجی، «هەیینی»یە!
یاسا وایە
«سەرۆکی دەوڵەتی بمرێ،
بەیداخ هەتاکوو نیوەی دار دائەگیرێ
گیانە، کە تۆش پایتەختی خۆشەویستیی من
جێ ئەهێڵی
بەیداخی هەڵبەستەکانم
نەک تا نیوەی داری دڵی چاوەڕوانی
هەر تەواو گرمۆڵە ئەکرێ.
نیشتمانی وشەکانم غەریبییە
ئاڵای: شێوە و ڕەنگی نییە
ڕێگەی: خوێنی هەڵگیرساوە
شاخەکانی: کاسەی سەری شەهیدانە
پەساپۆرتی: ڕەشەبایە
سەربازەکانی: قەڵەمی برسێتییە
بەرگی بەری: چۆغەی ئاگر و سەرمایە
خۆشەویستی: سەرچاوەیە
سنووری: ناو دڵی خوایە
وەرزەکانی: هەمووی ناوی حوزەیرانە!