لە دوورگەی خەوی زڕاوی شاعیرێکا

پەستم،
پەستم وەک کێڵگەیەک هەور
زیاد لە جارێ
بە سەر سەریا تێ بپەڕێ،
تێ بپەڕێت و نەبارێ!
پەستم،
پەستم وەک ئەو قومە ئاوەی لە سەنگەرا،
ڕژا و نەگەیشتە دەمی
پێشمەرگەیەک، شەهید کرا.
پەستم وەکوو سەرچاوەیەک: لیخن کرێ.
وەک مەچەکی هۆنراوەیەک
زنجیر، کرێ
پەستم وەک ئەو پێکەنینەی:
کە داگیرکەرم ئەیگرێ.
پەستم، پەستم
وەک سەعات پێنجی ئێوارەی
بیست و نۆی مانگی «نۆ» پەستم!
دوای گەشتەکەی «ئەرمسترۆنگ»یش
مانگ، هەر یار و دڵخوازمە
ئەم جارەیان: یارێ نییە
گێلۆکە بێ و نەخوێندەوار
ئەم جارەیان: شۆخوشەنگ و ڕۆشنبیرە
مانگی نازدار.
لەیەک کاتا
خۆم تیغم و خۆشم بڕین.
دەردم وەک چۆن دەرمانیشم.
پێکەنینم، هەرواش گرین
لەیەک کاتا
دەنگم ئەسپێکی گلاوی گردی ڕەشە
پێی لە ئاوزەنگی هاواری،
خۆی گیراوە.
دەنگم گۆمێکە، کە پردی
سەدەی بەنگێشی بیستەمی
تیا خنکاوە.
چارەنووسم، لەو دۆزەخی خوێنەدایە
لەو بڵێسەی شەوەدایە:
زیاتر، ڕەگی بوونی ئێستام بسووتێنێ
زیاتر، پێستی تەپڵی درۆی
دەهۆڵژەنی پرسەی ئارام، بسووتێنێ
چارەنووسم، چاوەڕوانی نێزەیەکە:
سەری «نووستنم» هەڵگرێ
چاوەڕوانیی لافاوێکە
باڵەخانەی سەرشەقامی شاری مردووم
لەگەڵ هاژەی خۆیدا بەرێ
لەسەر دیواری بێ دەرگای شاری نووستووی،
نیوەڕوانا
لە وڵاتی، دەمی مێشک ڕۆژوانا
لە مەزاتخانەی دەس و چاو فرۆشانا
لە پایتەختی مردووانا:
کەڵەشێرە بێپۆپنەکان، ئەقووقێنن.
بە سەر پارەی کڕکەوتوا، ئەقووقێنن.
بە سەر چاڵی جەرگی هەزار،
«پیرەمێرد و پیرێژنا»، ئەقووقێنن.
بە سەر قژی درەختی سەر
شەقامی پرسەی ڕنراوا، ئەقووقێنن.
لەبەر ئاوێنەی بێ پشتی
جیوە مردووی کڕێنراوا، ئەقووقێنن.
کەڵەشێرە بێپۆپنەکان:
بە سەر «گارینی» ئێمەدا،
ئەقووقێنن!