le dûrgey xewî ziřawî şa’îrêka

pestim,
pestim wek kêłgeyek hewr
zyad le carê
be ser serya tê bipeřê,
tê bipeřêt û nebarê!
pestim,
pestim wek ew qume awey le sengera,
řija û negeyşte demî
pêşmergeyek, şehîd kira.
pestim wekû serçaweyek: lîxin kirê.
wek meçekî honraweyek
zincîr, kirê
pestim wek ew pêkenîney:
ke dagîrkerim eygirê.
pestim, pestim
wek se’at pêncî êwarey
bîst û noy mangî «no» pestim!
dway geştekey «erimistirong»yiş
mang, her yar û diłxiwazme
em careyan: yarê nîye
gêloke bê û nexwêndewar
em careyan: şoxuşeng û řoşnibîre
mangî nazdar.
leyek kata
xom tîẍim û xoşim biřîn.
derdim wek çon dermanîşim.
pêkenînim, herwaş girîn
leyek kata
dengim espêkî gilawî girdî řeşe
pêy le awzengî hawarî,
xoy gîrawe.
dengim gomêke, ke pirdî
sedey bengêşî bîstemî
tya xinkawe.
çarenûsim, lew dozexî xwênedaye
lew biłêsey şewedaye:
zyatir, řegî bûnî êstam bisûtênê
zyatir, pêstî tepłî diroy
dehołjenî pirsey aram, bisûtênê
çarenûsim, çaweřwanî nêzeyeke:
serî «nûstinim» hełgirê
çaweřwanîy lafawêke
bałexaney serşeqamî şarî mirdûm
legeł hajey xoyda berê
leser dîwarî bê dergay şarî nûstûy,
nîweřwana
le wiłatî, demî mêşk řojwana
le mezatxaney des û çaw firoşana
le paytextî mirduwana:
kełeşêre bêpopnekan, eqûqênin.
be ser parey kiřkewtiwa, eqûqênin.
be ser çałî cergî hezar,
«pîremêrd û pîrêjna», eqûqênin.
be ser qijî dirextî ser
şeqamî pirsey řinrawa, eqûqênin.
leber awêney bê piştî
cîwe mirdûy kiřênrawa, eqûqênin.
kełeşêre bêpopnekan:
be ser «garînî» êmeda,
eqûqênin!