آراستن لشکر طرفین به رزم در عرصه‌گاه
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
3 دقیقه
644 مشاهده
ئەمرش کەرد سوپا یەکسەر بین سوار
ترتیب دا بە قەلب مەیمەنە و یەسار
وێش نە قەلبگاهـ، ئیبلیس مەیمەنە
ئەلخەنناس مەیسەر پەرێ فەرتەنە
هەرلا دان وە باد درەفش کەبوود
دلێران سەرمەست سەنان و عەموود
جەو تەرەف سەردار و وەزیر کامیل
تیپان بە ئایین جەنگ کەردن تەکمیل
وێش جە قەلبگاهـ، سەردار جە یەمین
جەنب یەسارش سپەر بە یەقین
نە جانیب یومن و یوسر و قەلبگا
سازان ئیحتیات، هەریەک نە یەک لا
جەقەلب و جەناح درەفش بی وەپا
پەنجەی درەفشان پۆشا میهر و ما
دەنگ تەپڵکووس، سەدای کەڕڕەنا
کیران تا کیران جیهان لەرزنا
سوپا مولەببەس جامەی فوولاد بی
ڕووی زەمین نە عەکس فوولاد سەواد بی
نەسیمەی دەهشەت سەردا جە شێران
لەرزە دا نە جەرگ ئەعزای دلێران
بارشت قەزا جە ئەبر ئەزەل
دا نە مەزرەعەی حەیات بە ئەجەل
دلێران حەرب نە پەی نەنگ و نام
هەرکەس پەرێ حەرب عەدوو کەرد خەرام
چەرخەچی جە بەین دەورییەی سوپا
گەرمی دان بە حەرب چون ئاهینڕوبا
یەک پەهلەوانێ جە سوپای ئیبلیس
قەدەم دا نە پێش مەرد مودەسسیس
میهمیز دا بە ئەسپ مەرد پەهلەوان
ئیسمش بە غافڵ فاش بی نە جیهان
لەرزنا نێزە، تەعلیم دا مەرکەب
موباریز جە سان یەمین کەرد تەڵەب
یەک نامدارێ جە سوپای سەردار
نەهیب دا بە ئەسپ، خرۆشا بە قار
بە گەرمی ئاتەش، بە توندی چون باد
ئیسمش نە عالەم مەشهوور بی بە «یادشخص»
دەوان دا بە ئەسپ، غوڕڕا بە غافڵ
واتش هەی ئەبلەهـ، هەی تەشنەی ئەجەل!
پاگیر بەر نە جا ئەی مەرد فەتوون
تاچیهرەی بەختت بە خوون کەم گوڵگوون
غافڵ دەرلەحزە نێزە شەند پەرێش
یاد دلاوەر سپەر دا نە ڕێش
چون سالم بی یاد جە زەخم نێزە
دەردەم وێنەی شێر نیشت نە ستێزە
دا نە کەمەرگاش یەک سەیف بوڕڕان
دووقەد بە غافڵ نە سەفحەی مەیدان
یەک شەخس هەنی فیتنە بی نامش
عالەم مەلەرزا لە زۆر و سامش
شانا پەرێ یاد قەددارەی فەنەر
ئیسپەر دا نەڕێش یاد دلاوەر
جە قووەی بازووی فیتنەی دڵ کەبوود
ئیسپەر پارە بی، شەق کەرد کڵاوخوود
یاد دلاوەر چون شێر ژیان
دا نە کەمەرگاش سەرمەودای سەنان
فیتنە جە هەوا ڕۆحش کەرد تەسلیم
ڕەوان بی چون دوود بە نار جەحیم
نەفس ناتیقە کەردش تەرەققی
ئاما جە مەیدان مەرد موتتەقی
دا نە فەرق یاد عەموود گران
سپەر دا نە ڕێش مەرد پەهلەوان
زەرب ناتیقە نەبەخشا تەئسیر
یاد دلاوەر دەست دا بە شەمشیر
دا نە کەتیف دۆش ناتیقەی عەنید
بی بە دووپارە مردار پەلید