آمدن ابلیس علیه العنة به میدان و رزم ساختن با یاد و گرفتنش
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
2 دقیقه
702 مشاهده
نە جەنب یەمین ئیبلیس مەردوود
بە بازوو کەمەند، بە دەستش عەموود
هەڵمەت بەرد چون ڕەعد هەوادا کەمەند
سەر و کەتف یاد مەحکەم کەرد جە بەند
سەردار حەقیق ستێزا جە سەف
بە بازووش ئیسپەر، سینانێ بە کەف
هەڵمەت بەرد پەرێ ئیبلیس وە بێ بیم
کەمەندش گرفت، بکەردش دوونیم
بازووی پەهلەوی بە چەنگ کەرد گوشاد
یاد دلاوەر جە بەند بی ئازاد
یادش کەرد ڕەوان بە مەقام وێش
وێش پاگیر حەرب ئیبلیس بەدکێش
ئەو حەربەی خەتەر، ئێد زەرب تەوحید
داشان بە هەمدا جە قورب و بەعید
سەرف کەردن جە یەک تیر و تەبەرزین
نە ئەو بی مەلوول، نە ئێد دڵحەزین
تا سەردار بە زەرب سەیحەی ساعیقە
دا نە کەللەی کەتف ئیبلیس باریقە
گوریز کەرد جە بیم ئیبلیس لەعین
سەردار جە عوقبەی لەعین چون شاهین
جە قەلبگای سەف یاوا بە مەردوود
دا نە کەتیف دۆش لەعین یەک عەموود
نەمەند جە مەلعون مەفسەدەی ئەفسوون
بێهۆش بی لەعین، نە خاک بی نیگوون
جەودەم مەرزییە ئاما بە خرۆش
هەڵمەت بەزد ئیبلیس بەرداڕۆ بە دۆش
دەرلەحزە سەردار بە نێزەی ئابدار
مەرزییەی لەعین کەردش نیگوونسار