راهی شدن خطرە به نزد وزیر و سردار مجاز
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
2 دقیقه
522 مشاهده
ڕاهی بی نەڕا عەییار گومڕا
جە خەیمەی سەردار مەجاز بی پیا
بە ڕەسم قانوون نامەش گرد بە کەف
بە سوجدەی سوجوود سەلام دا بە سەف
«توحفە» و هەدییە بە ڕەسم پێشکەش
تەقدیم کەرد جە پێش سەردار سەرکەش
«ئەو» بە خۆشحاڵی هەدیەش کەرد قوبووڵ
«هەم جە» ماجەرای ئوموور بی مەلوول
دەرلەحزە سەردار وانا نامەی وێش
سەرسام بی دەردەم بە دڵ دا تەشویش
نە مەجمەعەی فیکر خەیلێ کەرد خەیاڵ
پەسەند کەرد مەزموون نامەی بەدفیعال
پەرسا جە ئێلچی سەردار کەبیر
واتش بەیان کەر جە وەزیر تەقریر
ئێلچی بە تەعجیل ئاما بە گوفتار
ئەدا کەرد سەنای شایستەی سەردار
واتش جە ئەمیر مەرد مەئزوونم
مەئموور سەربەست نەوع فنوونم
داروون سفارش وەزیر موختار
پەرێ ئەنجومەن مەکەروون ئیزهار
زوومرەی ئومەرای سەردار و وەزیر
ئەر جەم بین یەکسەر مەکەروون تەقریر
ئەر قەبووڵ بی قەول جەلای ئەنجومەن
تەسهیل مەبۆ کار ئوموور هەر فەن
سەردار و ئێلچی هەردوو بین سوار
یاوان بە چادر وەزیر موختار
ئێلچی کەرد سوجدەی وەزیر تەعزیم
نامەش نە پای تەخت وەزیر کەرد تەقدیم
تەقریر ئێلچی مەزموون تەحریر
ئەسەر کەرد نە قەلب فەرخوندە وەزیر