بیان اصل و حکایت گذشتەی خودش
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
3 دقیقه
536 مشاهده
ئەسڵم نوجەبای نوجەبای تائیفەی جان بیم
ساحێب تەخت وبەخت سەر و سامان بیم
بە دیدەی دیققەت نیگام کەرد نەکار
زانام بە ئەفکار تائیفەی شەڕڕاڕ
موبتەلا مەبوون بە بەڵای عەزیم
نە شەبابیی عومر بە حەق بیم تەسلیم
جە قەهر قەههار کەردم ئەندیشە
تەریق سەواب حەق کەردم پیشە
وەیتەور جە تەقوا حەریس بیم عەنید
ڕووی زەمین یەکسەر کەردم بە مەسجید
هەریەن حەریس بیم جە تەقوای تەقدیس
مەشهوور بی جە ئەرز ئیسمم بە حەریس
نەمەند جە زەمین جێش نەکەم سوجوود
بە ئاخر ناڵام بە قاپیی مەعبوود
جە قاپیی ئەعلاش کەردم تەمەننا
سەقف سەماوات وەنەم کەرد عەتا
نەواتم ئەر خەیر من دارۆ جە ئان
ئەوسا عەتا کەر سەقف ئاسمان
دوعام قوبووڵ بی شیم پەرێ فەلەک
بیم بە مودەڕڕیس چەند هەزار مەلەک
چونکە جە ئەزەل ئێدش بی تەقدیر
تەقدیر بە تەدبیر نمەبۆ تەغییر
بەرسیسای عابید، بەلعەم و باعوور
بە مەغرووریی زوهد هەرسێ بین مەقهوور
چەند ئیمان بە کوفر، چەند کوفر بە ئیمان
جە مەشیەت حەق مەنمانۆ یەکسان
هەرگاهـ بەیتەورەن جەی دەهر نەگبەت
پەی چێش مەئیووس بان جە عەیش و عوشرەت
نەکەردەن عادەت زومرەی عورەفا
قیسمەت ئیمرۆز بەخشۆ بە فەردا
بەتاڵ کەیم نەدڵ مونازەعەی جەیش
بە کەیف بە شاییی وێمان کەریم عەیش
جە هەرخەیر و شەڕ ئەر بین ئیتتیفاق
حیفز مەبین جە شەڕ کەدەر و نیفاق
«الصلح خیرُعربی» کەلام حەققەن
هەم وەفا بە عەهد سیدق موتڵەقەن
بۆسا تەرەفەین بە عەهد ئایین
تەبدیل کەیم بە سوڵح موحارەبەی کین
خاسەی شاهانەن عەدل گوستەری
نیزام دۆ ئوموور ڕەعیەت پەروەری
پەی توحفەی جەننەت، ئەر بۆ ئەر نەبۆ
وێتان جە دنیا مەکەن ڕەنجەڕۆ
حەق پەی کامتەن شەهوەت کەردەن خەلق
پەی قووەی جەسەد خەڵقش کەردەن خەلق
بە مەنع هەردوو شەرع کەردەن تەکلیف
هەم جە بێخوابی کەردەنش تەعریف
چون کەریمەن حەق غەفوور و ڕەحیم
ئەبلەهـ ئەو کەسەن جە حەق کەرۆ بیم
هەرکەسێ ئەسباب بەزمش کەرد عوشرەت
جە دمای مەوتش مەمانۆ شوهرەت
پەی عیشق مەجاز، هەم پەرێ وەزیر
دوو نامەش وەیتەور ئاوەرد بە تەحریر
وات: تۆ ئێلچی بای نە هەر هەنگامە
نەدارۆ لوزووم تەحریر خامە
بە سککەی ئەفکار تەقریر دەر ڕەواج
سفارش پەی تۆ نییەن ئیحتیاج
ڕەسم قەدیمەن پەی تەسدیق کار
نامە پەی ئێلچی دارۆ ئیعتیبار
نامەش کەرد تەمهیر ئیبلیس عەنید
سپەردش بە دەست خەتەرەی پەلید
چەنی کەنیزان با توحفە و دینار
سپەرد بە خەتەر بەرۆش پەی سەردار