byan asil û ḧikayt gizşitey xudiş
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
3 Xulek
715 Dîtin
esiłim nucebay nucebay ta’îfey can bîm
saḧêb text wibext ser û saman bîm
be dîdey dîqqet nîgam kerd nekar
zanam be efkar ta’îfey şeřřař
mubtela mebûn be bełay ’ezîm
ne şebabîy ’umir be ḧeq bîm teslîm
ce qehir qehhar kerdim endîşe
terîq sewab ḧeq kerdim pîşe
weytewr ce teqwa ḧerîs bîm ’enîd
řûy zemîn yekser kerdim be mescîd
heryen ḧerîs bîm ce teqway teqdîs
meşhûr bî ce erz îsmim be ḧerîs
nemend ce zemîn cêş nekem sucûd
be axir nałam be qapîy me’bûd
ce qapîy e’laş kerdim temenna
seqif semawat wenem kerd ’eta
newatim er xeyr min daro ce an
ewsa ’eta ker seqif asman
du’am qubûł bî şîm perê felek
bîm be mudeřřîs çend hezar melek
çunke ce ezel êdiş bî teqdîr
teqdîr be tedbîr nimebo teẍîyr
bersîsay ’abîd, bel’em û ba’ûr
be meẍrûrîy zuhd hersê bîn meqhûr
çend îman be kufir, çend kufir be îman
ce meşyet ḧeq menmano yeksan
hergah beytewren cey dehir negbet
pey çêş me’yûs ban ce ’eyş û ’uşret
nekerden ’adet zumrey ’urefa
qîsmet îmroz bexşo be ferda
betał keym nedił munaze’ey ceyş
be keyf be şayîy wêman kerîm ’eyş
ce herxeyr û şeř er bîn îttîfaq
ḧîfiz mebîn ce şeř keder û nîfaq
«alsilḧ xîruErebî» kelam ḧeqqen
hem wefa be ’ehd sîdiq mutłeqen
bosa terefeyn be ’ehd ayîn
tebdîl keym be sułḧ muḧarebey kîn
xasey şahanen ’edil gusterî
nîzam do umûr ře’yet perwerî
pey tuḧfey cennet, er bo er nebo
wêtan ce dinya meken řenceřo
ḧeq pey kamten şehwet kerden xelq
pey quwey cesed xełqiş kerden xelq
be men’ herdû şer’ kerden teklîf
hem ce bêxwabî kerdenş te’rîf
çun kerîmen ḧeq ẍefûr û řeḧîm
ebleh ew kesen ce ḧeq kero bîm
herkesê esbab bezimş kerd ’uşret
ce dimay mewtiş memano şuhret
pey ’îşq mecaz, hem perê wezîr
dû nameş weytewr awerd be teḧrîr
wat: to êlçî bay ne her hengame
nedaro luzûm teḧrîr xame
be sikkey efkar teqrîr der řewac
sifarş pey to nîyen îḧtyac
řesim qedîmen pey tesdîq kar
name pey êlçî daro î’tîbar
nameş kerd temhîr îblîs ’enîd
siperdiş be dest xeterey pelîd
çenî kenîzan ba tuḧfe û dînar
siperd be xeter beroş pey serdar