دوو تابلۆی ژیان

چاوەڕوانین!
هەموو کاتەکانی ژینمان
چاوەڕوانی ڕووداوێکین
ڕووداوەکان ڕوو دەدەن و
ئێمە هەروا چاوەڕوانین!
لە دایک بوون، ڕووداوێکە
مردن ڕووداوێکی دیکە
ژین مەترسی نێوان ئەو دوو ڕووداوەیە!
ژیان، خاجێکی گرانە
من، وەک عیسا
بەرەو گردی یاخی بوونم
کێشی دەکەم!
یان گاشەبەردی تاوانە
من وەک سیزیف
لە بناری منداڵییەوە
هەتا لووتکەی مەرگی دەبەم!
هەرچەند بارم زۆر گرانە و
هەزار ساڵە
ئەم هەورازە تووشە دەبڕم
بەڵام شادم
کە سەرئەنجام
لە جولجوتای عیشقا دەمرم!