ئەسپەکەی قانع
از کتاب:
شاخی هەورامان
اثر:
قانع (1898-1965)
1 دقیقه
899 مشاهده
ئەی برادەر گوێ گرن بۆ تاریفاتی ناتەواو
یابوویێکم هەس چ یابوو؟ مۆخ و قووە تیانەماو
پاشۆ دیبەک، چاوتەنوور و گوێ وەکوو گێدرێژی پیر
کەللە دێو و بێ دیان و سینە وەک دەربەی شکاو
لاشە وەک گامێش و ڕۆحی زۆر بچووکتر بوو لە مێش
پەیگەشل، بن کلک فل، حەیتەزل و سابرێن گاو
قەت لە عومری خۆی سەعاتێ قاڵبێ ساغی نەبوو
ناوکەریش و هالەدار و جەوشەن و کەللە مقاو
زین پەڵاس و ڕەشوە بەن قەن، قوشقونی ناڵی دەزو
هەڵئەکێشێ ئاهـ و ناڵە ئەو بۆ نەختێ کای ڕزاو
کایەنی خاڵی و خەواڵە ئاخوڕی پڕبوو لە هیچ
وەک ژنێ بێزوو بکا بێزووی ئەکرد بۆ چۆڕێ ئاو
من بە سەریۆ یافەتاحم بوو کە ئەو سەرسم نەدا
ئەو لە ژێرۆ یا ڕەزاقی بوو لە بۆ سۆس و دەساو
ڕۆژی نەورۆز کردمە لاماڵ تا جەمامی دەربچێ
ئەووەڵی پاییز لە سەرخۆ گەییە کانی بۆ سەراو
قانعتخلصا ئەم ئەسپە چاکە بێنە مەیدانی گرەو
گاهێ ڕەوت و گاهێ وێرغە، گاهێ نەرمە و گاهێ تاو