عەشق
لەناو سەرما، لە باکووردا، عەشقێک هەیە پڕ لە باران
پڕ لە هەورە برووسکەیە. باران ڕاپەڕینی سەوزمە و
برووسکە باڵی بڕوامە و سەرم فەزا.
لەناو گیانما، لە باکووردا، عەشقێک هەیە پڕ لە باهۆز
باهۆز نیشتمانی چریکەمە و
دەمێک ئەبێ بە پەیامی کێوەکان و
دەمێکی تر بە هەناسەی شارەکان و
باهۆز ئەبێ بە شەقامی خۆرەتاو و
ئەبێ بە مانگی سەر چیا و
باهۆز ئەبێ بە گەریلا.
لەناو سەرما، لە باکووردا، عەشقێک هەیە پڕ لە سروود
سروودی ئاو، سروودی بەرد، سروودی بەفر و ڕەشەبا
سروود ئەبێ بە ڕووبار و ئەڕژێتە شیعرمەوە و ئیتر ئەڕوا
ئەڕژێتە جیهانەوە و سروود ئیتر هاژە ئەکا و
سروود ئەبێ بە دەنگی خوا
سروود ئەبێ بە ئەستێرەی ئەرخەوانی و
سەرم بە چرای گەریلا.
لەناو سەرما، لە باکووردا، عەشقێک هەیە
پڕە لە جریوەی منداڵ، پڕە لە ئاوێنەی گوڵ و
پڕە لە ئەوینی ژن و
پڕە لە گۆمی ڕووناکی و
پڕە لە هەنیسکی گەڵا.
لەم عەشقەدا
ئاوێنە ئەبێ بە ڕێگا
ئەوین ئەبێ بە گۆرانی و
گۆمیش ئەبێ بە چاوان و
هەنیسک ئەبێ بە هەڵەبجەمکان و
لەدواییشدا هەر هەموویان
ئەبن بە خەونی گەریلا!.
لەناو سەرما، لە باکووردا، لە ئێستەدا
عەشقێک هەیە پڕە لە ملیۆنان دەستی خۆر و
پڕە لە ملیۆنان جۆگەی دەنگ و
پڕە لە هەزاران شەقام و
دەستی خۆر ئەبێ بە دواڕۆژ
جۆگە ئەبێ بە ڕۆژنامە و
کێڵگە ئەبێ بە زاری نان
لەدواییشدا شەقام ئەبێ بە «ئۆجەلانشخص»
لەناو سەرما، لە باکووردا، لە ئێستەدا
عەشقێک هەیە پڕ لە هەور
پڕ لە کانیی ژێرزەمینی و
پڕیش لە هاواری ناکاو
هەور ئەبێ بە دەربەندی هاژە و سێڵاو
کانیش ئەبێ بە بوومەلەرزەی جەستەم و
هاواریشم بە وڵاتێکی هەڵقرچاو
لەناو سەرما، لە باکووردا، لە ئێستەدا
عەشقێک هەیە، عەشقی «وانمکان»ێکی تینووە
عەشقی گڕێکە زیندانی و عەشقی زمانێکی زامدار
وان هەڵئەسێ و لە ئازادیی ئەخواتەوە
گڕ هەڵئەسێ و نەورۆز ئەباتە سەر لووتکە و
ئەم زمانە زامدارەیشم ڕائەچڵەکێ و
دەرگا لەسەر حەرفەکانی ئەکاتەوە.
لەناو سەرما، لە باکووردا، لە ئێستەدا
عەشقێک هەیە، عەشق بووە بە پەنجەرەی هەموو ماڵێ
عەشق بووە بە سترانی هەموو ماڵێ
عەشق بووە بە باڵندە و بە درەختی هەموو ماڵێ
لەناو سەرما، لە باکووردا، لە ئێستەدا
عەشقێک هەیە، هەموو ڕۆژێ گەورە ئەبێ و گەورە ئەبێ
لە ئێستەدا وڵات جێی تیا نابێتەوە
دارستانێ بڵێسەیە و پەل ئەهاوێ، پەل ئەهاوێ بەرەو ژوورتر
ئەگاتە شەوی ئەنقەرەمکان و ناڵە ئەکات. پەل ئەهاوێ
ئەگاتە ناو ئەستەموڵمکان و شەقام شەقام لرفە ئەکات. پەل ئەهاوێ
ئەگاتە ناو پێکەنینی ئەتاتورک و پێکەنینی ئەکا بە خۆڵ
ئەمە کڵپەی عەشقی منە، عەشقێکە و ناوی گەریلا و
عەشقێکە ناوی کوردستان.
ئەمە کڵپەی عەشقی منە، ئازادیی ئەنووسێتەوە
لەسەر جەستەی شەهیدان و لە ئێستەدا
بووە بە نەورۆزی جیهان!