بڕوا بە یار
از کتاب:
چەپکێ گوڵ و خونچە
اثر:
علی عارف آقا (1910-1996)
1 دقیقه
239 مشاهده
بڕوا بە یاری بێوەفا ناکەم
دڵم پێشکەشی یاری وا ناکەم
ئەو چارەسازەی بێچارەی کردم
ڕەچەتەی دەوای لێ داوا ناکەم
یارێ کە پیشە ئازاری دڵ بێ
داد و بێدادی هیچ لەلا ناکەم
ئەوەی کە قەدری منی لا نییە
بشمرم لای ئەو یەک تکا ناکەم
لە دەرد و داخی سامانی فەوتاو
چارەم بەگرژی ئاشکرا ناکەم
هەرچەندە مات و پەست و هەژارم
لە ژینا لای کەس سکاڵا ناکەم
لە کات و ساتی ڕەشەبای ژینا
خەرمانی هیوای دڵ بە با ناکەم
ئاسمانی ژین تا تەماوی بێ
گیانم بۆ شادی بەتەما ناکەم