دوا خواحافیزی
از کتاب:
دیوانی عوسمان عوزێری
اثر:
عثمان عوزیری (1936-1966)
2 دقیقه
669 مشاهده
وا بەجێتدێڵم گیانەکەم ئازیز
ئەمە دواجارمە ئەڵێم خواحافیز
چونکە بە ناهەق دڵت شکاندم
گشت خۆشی، شادییت لە دەست فڕاندم
دڵمت بەجارێ پڕ کرد لە ئازار
لەجێی پێکەنین هەر گریەمە و زار
بەڵێنت دامێ کەوا هەردووکمان
تا مردن یەکمان خۆش بوێ بە گیان
کەچی بۆ دوایی بێوەفا دەرچووی
وەهام نەزانی کە بێبەڵێن بووی
وەک خەڵووز دڵمت ڕەش کرد لە سنگما
ڕۆحی بێچارەت دەرکرد لە چنگما
وتت بمدەرێ بۆ یادگاری
هەڵیانئەگرم بەوێنەی دیاری
دوای ئەوە هەموو ئەندامەکانم
لەلای من نەمان نە ڕۆح نە گیانم
هەموویانت کرد بە بەشداری خۆت
دەست و پێم مابوو بەشیان بوو بە کۆت
کەچی بەبێ هۆ هەمووت فڕێ دان
لە خوا نەترسای بێ دڵ و ویژدان؟
هەر بەشەی زامێ بوو بە هاوبەشی
لەشیش بێچارە بە بەختی ڕەشی
وەکوو دێوانە ئاوارەی هەردە
خۆشیی نابینێ هاوەڵی دەردە
خوای دڵدارانیش خۆی هەقستێنە
باش ئاگادارە بەم بگرە و بێنە
کەواتە ئەڕۆم خوات لەگەڵ، ئەی گیان
ئاخۆ چەندەی تر ئەخەیتە زیندان
بەوێنەی منی هەژاری کڵۆڵ
لە جیاتی باخچە ئەیانخەیتە چۆڵ
ئیتر گیانەکەم بەبێ گفتوگۆ
لەوە زیاتر لەسەری مەڕۆ
ئەمجا خواحافیز جادووی بێپەیمان
دوا خواحافیزت لێ بێ هەمدیسان