مناجات به درگاه قاضی الحاجات
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
3 دقیقه
722 مشاهده
ئیلاهی! بە حەق پادشاهی وێت
بە عیززەت لوتف لاتەناهیی وێت
بە عەزیمی وێت موبەڕڕای مەکان
هەر ڕۆ تەجەللای زوهوور نە یەک شان
بەشق کەلیمات ئەسمای سیفاتت
بە حورمەت نوور هەر مەوجووداتت
بە شەرافەت نوور ئەنبیا و ڕەسوول
جە عەبد عاسی دوعا کەر قەبوول
چیهرەی پڕ چینم خەجاڵەتبارەن
جەبین نوتقم بێ ئیعتیزارەن
حەمل گوناهان خەم کەردەن قامەت
سکەم سفید بی نە هەر نەدامەت
جە دەرگای گونا خەیلێ زەلیلم
غەیر جە لوتف تۆ نییەن دەلیلم
هەر تۆی فریادڕەس، هەر تۆی ڕەهنموون
هەر تۆی ئاگاهدار نە هەر چەند و چوون
هەر من جە قووەت زەعیف و زارم
هەر من جە عیسیان وێم شەرمەسارم
بە حورمەت نوور خیتامەت پەنا
جە هەردوو عالەم ئەوەن ڕەهنوما
بە سیدق و سەخای بووبەکری سیددیق
هەر ئەو بی ئەنیس نەبییی شەفیق
وێت ئەمرت کەردەن بەو زات نیکنام
ئەر ئەو ڕەزا بۆ من جە ئەو ڕەزام
بە شەرافەی نوور ئەو عالیی جەناب
کونیەش هەم فارووق، هەم «ابن الخطابعربی»
پڕتەوی عومەر حوکمش سەند مەهیب
پڕ بی نە عەدڵش مەشریق و مەغریب
بەشق زیحەیا «جامع القرآنعربی»
یەعنی «ذي النورينعربی» شای ئیبنو عەففان
بە دەریای عولووم ویلایەت پەنا
وەسیی نەبی، ئەشجەعی دنیا
حەیدەر کەڕڕاڕ جانفیدای ڕەسوول
«هل اتیعربی» جە شەئن سەناش کەرد نزوول
بە فەزڵ زەهرا و نوور حەسەنەین
بەشق شەهیدان ڕای بەدر و حونەین
بە حورمەتی نوور سەحابەی کیرام
بە ئەنوار پاک هەر دوازدە ئیمام
عەفوم کەر بە لوتف جە هەر سەییئات
بکەر ئازادم نە هەر سەدەمات
قەسدم نە کردەی شەڕ نە شیتابەن
تەکاهول نە ئەمر کردەی سەوابەن
چون جە کردەی وێم خەجاڵەتبارم
عاسی و ڕووسیا، گوناهەن کارم
ئیستە جە کردار بەد بیم پەشیمان
وێم وست نە ئامان ئەو بەحر ئیحسان
نە هەر لا قەتعەن عوزر و ئیعتیراز
بە قاپیی عوزمای تۆ داروون نیاز
وەیتەو سەرئەفگەن دەروون وە تابم
هەر تەرەف، هەر جا، خانە خرابم
نە یەک لا، خانەی ئوخرام خاپوورەن
یەک لا، دڵ نە دەرد دنیا ڕەنجوورەن
نە یەک لا نە حوکم زاڵم مەزڵوومم
یەک لا نە کردەی بەدان مەحکوومم
تەحقیق شەئامەت گونا و خەتامەن
هەر تەرەف بەیتەور پاگیر پامەن
بە عیززەتی وێت جیهان ئافەرین
بە حورمەتی نوور «ختم المرسلينعربی»
نییەن پەناهم غەیر جە زات تۆ
عەفوم کەر بە لوتف جە گونای بێشۆ
هەم نەی بەند سەخت پڕ دەرد و ئەلەم
بدەر نەجاتم شەهەنشای ئەعزەم
هەم بدەر تەوفیق زات ئەکبەری
میزان کەیم ئەفکار جەبری و ئەشعەری
ڕەوشەن کەر زەمیر بە نوور ئیمان
حیفزم کەر، یاڕەب، جە عەیب و نوقسان
بدەر تەوفیقم جەی نوقتەی باریک
غەڵەت نەکەم ڕا نەی بەحر تاریک
عەتا کەر ئیمان بەی بەندەی کەمتەر
مەحفووز کەر «فەقێتخلص» فیکرش نە خەتەر