در ثواب استغفار گوید
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
2 دقیقه
827 مشاهده
واریدەن حەدیس نەبییی ئەبرار
هەرکەس جە گونای وێش کەرد ئیستیغفار
فەرەجش مەبۆ جە هەر هەم و غەم
هەم جە تەنگیی ڕزق مەحفووزەن هەردەم
بزورگ هەر زیکر نەفی و ئیسباتەن
ئیستیغفار سەیید جەمیع ئەورادەن
شێخ سیووتی «رحمة اللەعربی»
ڕیوایەت کەردەن جە یەک ئەولیا:
یەک جە سەولەحا فەوت بی جە دنیا
ئاما بە ڕوئیای ئەو «وليّ اللەعربی»
جەو مەرد مەدفوون کەردەبێ سوئال:
چ تەورەن حاڵت جە نامەی ئەعمال؟
ئاما بە جواب ئەو مەرد مەدفوون:
وەقتی ڕۆح نە تۆی قاڵب بی بیروون
بە عرووج ڕۆح جە نامەی ئەعمال
مەکشووف بی سیفات سەواب و وەبال
جە هەر گوناهێ، سەغیر ئەر کەبیر
ئیستیغفارم بی، نەدیم جە تەحریر
هەر گونا وەنەش نەبی ئیستیغفار
جە نامەی ئەعمال وەنەم بی ئیزهار
پۆسە جە ئایەی قەدیم ئیزهارەن
تەریق نەجات بە ئیستیغفارەن
مەعاوومەن جە لای زومرەی عەزیزان
کاک ئەحمەدی شێخ ئەو قوتب زەمان
جە مەکتووب وێش ئەو پیر کامیل
فەزل ئیستیغفار کەردەنش تەکمیل
جە ئەدعیەی خزر ئەو شێخ وەلی
هەم جە دوعای غەوس، شێخ شازلی
ئەو قوتب عارف «عليە الرحمةعربی»
ئەدعیەی خزرش کەردەن تەرجەمە
ئەو بە فارسی هەفتاد ئیستیغفار
تەرجەمەش کەردەن پەی تەسهیل کار
فەرموودەی شێخەن پەی ئەهل غەفڵەت
هەرکەس بە زوبان وێش کەرۆ دەعوەت
بزانۆ مەعناش نمەبۆ غافڵ
ئەو دوعای تەئسیر مەکەرۆنە دڵ
من هەم تەرجەمەی ئەو پیر کامیل
بە لەفز «گۆران» کەردەنم تەکمیل
ها کەردم ئینشا هەفتاد ئیستیغفار
شێخ فەرمان هەر ڕۆ بوانان یەکجار
«فەقێتخلص» خەواسش نمەبۆ تەمام
ڕەوان کەر پەی ڕۆح موحەممەد سەلام