تۆ چیت؟ من کوردم!
از کتاب:
دیوانی فایق بێکەس
اثر:
فایق بیکس (1905-1948)
1 دقیقه
1417 مشاهده
تۆ چیت؟ من کوردم نەتەوەی گوردم
خۆ ترسنۆک نیت؟ حاشا نەبەردم
چی تۆی لەناو برد؟ دوو دڵی و نیفاق
چۆن ڕزگار ئەبی؟ هەر بەئیتتفاق
بڵێ چیت ئەوێ؟ بەرزیی وەتەنم
بەخۆڕایی نا، بەگیان و تەنم
چیت لە بارایە؟ خۆ فیداکردن
بۆچی؟ لە ڕێگای میللەتا مردن
کوا، چەکت چییە؟ سەودای وڵاتم
ئەی پشتیوانت؟ عەزم و سەباتم
ڕاستت پێ بڵێم؟ فەرموو گوێم لێتە
بەقسەم ئەکەی؟ سەرم لە ڕێتە
بەڕاستی و پاکیی هەوڵ و تێکۆشین
لە کورسی و کینە و درۆ چاو پۆشین
ئەمانەت نەبێ کارت زۆر لەقە
بەشت هەمیشە نەگبەتی و شەقە