لە چاوەڕوانی نالیدا

بارانێکی ئاگرین و ئاسمانێکی پیرۆزەیی
مەلی لانە شێواومانی، عاشق کرد بە گڕی سپی
باران.. باران، ئاگر، ئاگر، ئاسمان.. ئاسمان، بوونە ژیان
بۆ کۆتری شێواوە لان، بوون بە لان، بە نیشتمان
ئەی ڕێژنە باران
ئەی قوببەی ئاسمان
ئەی مەلی بێ لان
بۆ عیشقی سپی سەما- کەن
گەردوونانە تەماشا-کەن
ئەی ئاهووەکەی خانە بێزار
کەی دێیتەوە؟ کەی.. کەی؟ بۆ شار
کەی دێیتەوە لای حەبیبەی
ماڵی ئاوای، وێرانە ماڵ؟
نیشتمانەکەم ئاوەدان بکەن
خودی نەتەوەم، شارستان بکەن
لە ئاسۆوە تیلماسکێکی ئاڵ و بەرین
کۆترەکانی، وەکو دڵمان، بەخوڕ دەگرین
دەگرین بەخوڕ، دەگرین بەخوڕ
بۆ تیلماسکێکی ئاڵ وەکو گڕ.
ئەی تیشکی بەهەور دژ
ئەی هەوری ڕەشی قژ بژ
ئەی تارمایی هەردەم گرژ
بۆ ئومێدی ئەو ئاسۆیە.. چۆک دادەن
بۆ ئەو هەموو ڕەنگ و بۆیە.. چۆک دادەن
هاکا لافاوی ڕێژاو
جێی دزە پێی شووشتەوە
هاکا عیشقی خۆرەتاو
دەواری هەڵخستەوە
زرنگەی پیاڵە و گیزەی سەماوەر
دەبنەوە هاوڕێی شەماڵ و سێبەر
هاکا هەواڵی بووکی تارا ئاڵ
گەیشتە زاوای بەردەمی ڕەشماڵ
زەنگی وڵاخی کاروانی بەهار
حەزرەتی «نالی»ی خستەوە گوفتار
کۆترانی شیعری لان شێواوی من
پەپوولەی ڕوحی دڵ ڕەنجاوی من
لەسەر تەنافی شەختەی غەریبی
هەڵکورماون و ئێستاش دەلەرزن
ئەی ئاهووەکەی خانە بێزار
تکایە بێرەوە بۆ شار
بێرەوە بۆ لای حەبیبەی
ماڵی ئاوای، وێرانە ماڵ
لە ئاسۆوە ڕێبوارێکی خەم شیرین
چاوەنواڕە عارەقی ماندووی بسڕین
کاشکا هەموو یەک دڵ و گیان بۆ لای دەچووین
کاشکا بەدیداری سەوزی سەربەرز دەبووین
دەچووینە لای
دەچووینە لای
یەک دڵ و گیان، بێ ڕک و کین
یەک دڵ و گیان، بێ ڕک و کین
هەموو خەممان
هەموو خەممان دەکرد بە یەک خەمی شیرین
هەموومان
هەموو خەممان دەکرد بە یەک خەمی شیرین