لە چاوەڕوانی نالیدا

لە کتێبی:
خەونی سەما دژەکان
بەرهەمی:
دڵشاد مەریوانی (1947-1989)
 2 خولەک  750 بینین
کۆرس:
بارانێکی ئاگرین و ئاسمانێکی پیرۆزەیی
مەلی لانە شێواومانی، عاشق کرد بە گڕی سپی
باران.. باران، ئاگر، ئاگر، ئاسمان.. ئاسمان، بوونە ژیان
بۆ کۆتری شێواوە لان، بوون بە لان، بە نیشتمان
کوڕان:
ئەی ڕێژنە باران
کچان:
ئەی قوببەی ئاسمان
کوڕان:
ئەی مەلی بێ لان
کوڕان و کچان:
بۆ عیشقی سپی سەما- کەن
گەردوونانە تەماشا-کەن
کچێک:
ئەی ئاهووەکەی خانە بێزار
کەی دێیتەوە؟ کەی.. کەی؟ بۆ شار
کەی دێیتەوە لای حەبیبەی
ماڵی ئاوای، وێرانە ماڵ؟
کوڕێک:
نیشتمانەکەم ئاوەدان بکەن
خودی نەتەوەم، شارستان بکەن
کۆرس:
لە ئاسۆوە تیلماسکێکی ئاڵ و بەرین
کۆترەکانی، وەکو دڵمان، بەخوڕ دەگرین
دەگرین بەخوڕ، دەگرین بەخوڕ
بۆ تیلماسکێکی ئاڵ وەکو گڕ.
کوڕان:
ئەی تیشکی بەهەور دژ
کچان:
ئەی هەوری ڕەشی قژ بژ
کوڕان:
ئەی تارمایی هەردەم گرژ
کوڕان و کچان:
بۆ ئومێدی ئەو ئاسۆیە.. چۆک دادەن
بۆ ئەو هەموو ڕەنگ و بۆیە.. چۆک دادەن
کچێک:
هاکا لافاوی ڕێژاو
جێی دزە پێی شووشتەوە
هاکا عیشقی خۆرەتاو
دەواری هەڵخستەوە
کچان:
زرنگەی پیاڵە و گیزەی سەماوەر
دەبنەوە هاوڕێی شەماڵ و سێبەر
کوڕان:
هاکا هەواڵی بووکی تارا ئاڵ
گەیشتە زاوای بەردەمی ڕەشماڵ
کوڕان و کچان:
زەنگی وڵاخی کاروانی بەهار
حەزرەتی «نالی»ی خستەوە گوفتار
کوڕێک:
کۆترانی شیعری لان شێواوی من
پەپوولەی ڕوحی دڵ ڕەنجاوی من
لەسەر تەنافی شەختەی غەریبی
هەڵکورماون و ئێستاش دەلەرزن
کچێک:
ئەی ئاهووەکەی خانە بێزار
تکایە بێرەوە بۆ شار
بێرەوە بۆ لای حەبیبەی
ماڵی ئاوای، وێرانە ماڵ
کۆرس:
لە ئاسۆوە ڕێبوارێکی خەم شیرین
چاوەنواڕە عارەقی ماندووی بسڕین
کاشکا هەموو یەک دڵ و گیان بۆ لای دەچووین
کاشکا بەدیداری سەوزی سەربەرز دەبووین
کوڕان:
دەچووینە لای
کچان:
دەچووینە لای
کوڕێک:
یەک دڵ و گیان، بێ ڕک و کین
کچێک:
یەک دڵ و گیان، بێ ڕک و کین
کۆرس:
هەموو خەممان
هەموو خەممان دەکرد بە یەک خەمی شیرین
هەموومان
هەموو خەممان دەکرد بە یەک خەمی شیرین