دوو کتێب لە ناو فەقێیانا باوی هەبوو...
دوو کتێب لە ناو فەقێیانا باوی هەبوو ئەخوێنرا، یەکێکیان «عوامل» یان پێ ئەوت، ئەویتریان «جمع الجوامع». ئەو کەسەی کە سەرەتا ئەچووە فەقێیەتی دەستی ئەکرد بە «عوامل» و ئەوەی ئەخوێند. ئەوەش کە لە فەقێیەتی ئەبۆوەوە هەموو عیلمەکانی ئەخوێند، دەستی ئەکرد بە «جمع الجوامع». مەعنای وایە ئەم دوو کتێبە تەقریبا ئەمسەر و ئەوسەری خوێندنی فەقێیەتیە. شێخ عەلی پەڕۆ هەبوو لە سولەیمانی، مەلایەکی وانەبوو. مەلا شێخ بابە عەلی تەکیەیی هەموو جارێک ئەیوت شێخ عەلی عوامل و جمع الجوامع وەکوو یەک ئەزانێ. شێخ عەلی ئەمەی پێ خۆش بوو، یەعنی چۆن عواملی بە لاوە ئاسانە، بۆ زانینەکەی جمع الجوامعیشی بە لاوە ئاوایە و بە باشی ئەیزانێ. لەگەڵ ئەوەشا مەبەستی بابە عەلی ئەوە نەبوو، مەبەستی ئەوە بوو، کە چۆن عوامل بەو ئاسانییە نایزانێ جمع الجوامعیش هەروەها نازانێ، لە زانینیانا هەر وەکوو یەک وایە.