قیبلەکەم ئەر تۆ وەفادار مەبیت
از کتاب:
هەوارگەی دڵان
اثر:
سید طاهر هاشمی (1915-1991)
1 دقیقه
487 مشاهده
قیبلەکەم ئەر تۆ وەفادار مەبیت
ڕۆی ویساڵ، ڕووی هیجر وە چەم نمەدیت
بەڵام با وەس بۆ دەمەی بێداخی
گێجای لوول گێج دڵ پڕ پەرداخی
داخ وە جەرگمدا پەی چی بەردەنی
مەر وێت سزای زووخ زام نەوەردەنی؟
بەڵێ من سەردیم گاوەگا بیەن
بەڵام نەک وەیتەور جە حەد بەر شیەن
سەردیی من جە ڕووی ناز و نیازەن
چوون شنۆی شەماڵ هامن دڵوازەن
نەک چوون سەردیی تۆ پاییزان بێزەن
وە بێوادە وەڵگ نەمامان ڕێزەن
بێباکیت حەیات عاشقان بڕەن
ئیستغنات پەردەی دەروونان دڕەن
بێشەرتیت یەکجار شێونا یانەم
کەم دیات سا کەرد تەمام وێرانەم
بازە با غەمزەت گیانم نەسانۆ
پەی نیشانەی تیر مەینەت بمانۆ