جە سەربەرزاندا
از کتاب:
هەوارگەی دڵان
اثر:
سید طاهر هاشمی (1915-1991)
2 دقیقه
515 مشاهده
جە سەربەرزاندا ...
با با بۆت بارۆ جە سەربەرزاندا
جەو شەوبۆی وەدەم نەسیم لەرزاندا
بدۆ نە دەماخ خەمان هەرزاندا
ئای شوکرم وە حەق دوعام گیرا بی
بۆی وەش ئامێتەی کەش و سارا بی
گیان نە هەتیتەی ئازاو دڵ بێ
دڵ پەی بۆی زوڵفت نە جۆش و کوڵ بێ
دڵ کێشا نەفەس کەم بی دەرد و داخ
گیان جە عەتر لەیل دەماخش بی چاخ
دڵ واتش ئۆخەی نەی سوب سەحەردا
دیسان گیانێو نۆم ئاماوە بەردا
گیان دڵ وە عەزرەت وە ئاواتەوە
واتش شوکرانەم، نەسیم هاتەوە
نەسیم نەدیم هەڵقەی زوڵف لەیل
جە بۆی ڕەوانبەخش بۆی هەناسە کەیل
نەسیم هامدەم پیرۆزە خاڵان
شادی زەوق ئاوەرد خەم دا وە تاڵان
نەسیم هامڕاز شەکەرین ڕازان
نەی سوب سەحەردا چ بەزمێش سازان
شنۆش شکاوا پەردەی خونچەی دڵ
سروەش کەردەوە سەد گرێ موشکڵ
یاحەی، هەی نەسیم نەفەست ساف بۆ
جات نە پێچ خەم مشکین کڵاف بۆ
دایم بویەری نە یەخەی جامە
سەرکێشی نە باخ لیمۆ و شەمامە
وەیتەور تۆ خەرمان خەمان دەی وە باد
تا دنیا دنیان بمانی وە شاد
نە زوڵمات تار، هەڵقەی هەزارخەم
وە ئاو حەیات بیاوی هەردەم
نە سەدر سینەی ساف سەدەف بێز
بیاوی وە ناف ئاهووی سەحەرخێز
سەرکێشی نەچای غەوغەو وە دڵواز
بنۆشی نە جام مەی وەش وە سەد ناز
لادەری نەسای دانەی خوردە خاڵ
نە کان یاقووت سەرچەشمەی زەڵاڵ
دیسان نە سەحەر جەبهەی پڕجەڵا
وێ وزی چوون من نەدام بەڵا
سەر باری وە بەرجەو لای دامەوە
وە بۆی وەش نەسیم مشکین فامەوە
پەی ساکنی دەرد باوەری وەلام
ساڕێژ بۆ زامان، سالم بۆ ئەندام