ce serberzanda
From the Book:
Hewargey Diɫan
By:
Seyyed Taher Hashemi (1915-1991)
2 minutes
669 views
ce serberzanda ...
ba ba bot baro ce serberzanda
cew şewboy wedem nesîm lerzanda
bido ne demax xeman herzanda
ay şukirim we ḧeq du’am gîra bî
boy weş amêtey keş û sara bî
gyan ne hetîtey azaw dił bê
dił pey boy zułifit ne coş û kuł bê
dił kêşa nefes kem bî derd û dax
gyan ce ’etir leyl demaxiş bî çax
dił watiş oxey ney sub seḧerda
dîsan gyanêw nom amawe berda
gyan dił we ’ezret we awatewe
watiş şukiranem, nesîm hatewe
nesîm nedîm hełqey zułf leyl
ce boy řewanbexiş boy henase keyl
nesîm hamdem pîroze xałan
şadî zewq awerd xem da we tałan
nesîm hamřaz şekerîn řazan
ney sub seḧerda çi bezmêş sazan
şinoş şikawa perdey xunçey dił
sirweş kerdewe sed girê muşkił
yaḧey, hey nesîm nefest saf bo
cat ne pêç xem mişkîn kiłaf bo
daym buyerî ne yexey came
serkêşî ne bax lîmo û şemame
weytewr to xerman xeman dey we bad
ta dinya dinyan bimanî we şad
ne zułmat tar, hełqey hezarxem
we aw ḧeyat byawî herdem
ne sedir sîney saf sedef bêz
byawî we naf ahûy seḧerxêz
serkêşî neçay ẍewẍew we diłwaz
binoşî ne cam mey weş we sed naz
laderî nesay daney xurde xał
ne kan yaqût serçeşmey zełał
dîsan ne seḧer cebhey piřceła
wê wizî çûn min nedam beła
ser barî we bercew lay damewe
we boy weş nesîm mişkîn famewe
pey saknî derd bawerî welam
sařêj bo zaman, salim bo endam