هامدەردان نییەن
از کتاب:
هەوارگەی دڵان
اثر:
سید طاهر هاشمی (1915-1991)
4 دقیقه
596 مشاهده
هامدەردان نییەن ...
وێنەی من مەحرووم جە دەوران نییەن
جسمم نە خەمیر حیرمان خەلق بییەن
ڕۆحم وە مەحرووم نە قاڵب شییەن
هەسارەی تاڵەم نائومێدییەن
چوون من نائومید، کەسێ کەی دییەن؟
هیچ عاشق نەبێ، وە کە ڵپۆسەوە
چوون من بلەرزۆ، وە مەئیۆسەوە
هیچ مەجنوون نەبێ نەدوجەیلەوە
بێ مایە دوور بۆ جە کۆی لەیلەوە
هیچ فەرهاد نەبێ وە حەزینەوە
نەدیۆ لادێ مەیل جە شیرینەوە
چەن شەوان تا ڕۆ، ئاە و ناڵەم کەرد
وە قاپی یەزدان شفا و لاڵەم کەرد
گێڵام نە ئاڵەم وە بێ مەنا و خەوف
یەکیەک ئاسانەی پیران کەردم تەوف
واتم مەر شۆران ڕەنگ مەحروومیم
هۆرداران جە دووش لونگ مەزڵوومیم
جە کەجی بەختم فایدەش نەکەرد
عاقیبەت مەندم چەنی بار دەرد
بادەی مەحروومیم، لاجورعە نۆشا
بەرگ مەزڵوومیم نە باڵا پۆشا
چەنی سووەیدای دڵەی تەنگەوە
هیچ نەمام وە تەنگ نام و نەنگەوە
وێم پەرێ وێم ساز بەدنامی ژەندم
وێم ڕیشەی دانش، عەقڵ ودین کەندم
وێم گێڵام بێدی، وێنەی سەرسامان
خەستەی زووخ زام جە سەر تا دامان
سەر تا پام سوفتەی نایرەی دەردەن
مایەی تەسسەلیم، هەر ئی چەن فەردەن
کەی دڵبەر چەنیم حەقنەناس مەبی؟
ئەگەر بێبەینەت وادەش ڕاس مەبی
بێبەینەت وەیتەوریانەم خاپوور کەرد
بێ دین دڵبەر، دیدەم بێ نوور کەرد
بێبەینەت تیرم بەرد نە تۆی دڵدا
بێبەینەت جەرگم دا بە سەرچڵدا
بێبەینەت چون شێت ڕوو ئەو هەردم دا
بێبەینەت نە جای دەوا دەردم دا
بێبەینەت جە دین دانش جیام کەرد
بێبەینەت ڕسوای دەور دنیام کەرد
بێ بەینەت وە قەوڵ وێش دا فریوم
ژاراو حیرمان کەرد وە نسیوم
بێبەینەت ئایر مەوست ئەو یانەم
بێبەینەت چوون قەیس مەکەرد دێوانەم
بێبەینەت کاڵای خەم گرت وە باڵام
بێبەینەت دوور کەرد جە قاپی واڵام
بێبەینەت یا ڕەب خاترش شاد بۆ
بێبەینەت یا حەی عومرش زیاد بۆ
پەیچی نەپەرسای، پەیچی نەپەرسای
بێبەینەت حاڵم پەیچی نەپەرسای؟
لادێ جە غەزەو خودا نەتەرسای
خاکم بە دەهەن، مەگەر تۆ تەرسای؟
مەگەر من قاتڵ ئیمام حوسەین بیم
مەگەر مونافق پڕ کەید و شەین بیم؟
مەگەر هامڕەفێق ئیبنووئوبەین بیم
مەر نمەک حەرام دەرماڵ کەی بیم؟
مەر فیتنەی دەوران زادەی حیکەم بیم
مەر وەیشوومەی شووم ئیبنوومولجەم بیم؟
مەر جەرگ حەمزە جە غیرەت جاوام
یا «سن» شەریف حەزرەت شکاوام؟
مەر جگەرگۆشەی پەیغەمبەر کوشتم
پەنجە وە هووناو ئیمامان ڕەشتم؟
مەر ئەبوو لوئلۆی دوور جە ئیمان بیم
یا هوون ناحەق ئیبنوعەفان بیم؟
برا، چ تەقسیر تاوانم چێش بی
پەیچی تۆ جە من خاترت ڕێش بی؟
من تۆم وە چەشمەی ڕەحمەت مەزانا
من تۆم وە مایەی سەفوەت مەوانا
واتم جانشین قوتب والانی
خەلیفەی وە حەق غەوس بەغدانی
نەزانام وەیتەور مەیل وە جەنگەنی
چون دەوران، چەنی من دوو ڕەنگەنی
ڕەحمت بی وە تیرشی وە دەرووندا
سەفات چوون زوڵمەت من بەرد وە تووندا
جیاتی وە مەیل بگیری دەستم
هەروێت دای وە جەور مەینەت شکەستم
ئاخ قیبلەم من چەند ئومێدم پێت بێ
نەزانام پێسە مەینەت خدێت بێ
شیشەی ئارەزووم مەڕدی وە سەنگدا
جەرگم دای وە نێش مەودای خەدەنگدا
لونگ گومڕاهی وەستی نە پێڵم
کەردی نەڕاگەی تەریقەت وێڵم
شەرت و عەهد و بەین، گشت جە یاد بەردی
من ڕسوای ئالەم حەقیقەت کەردی
ڕشتەی ڕابیتەی دەروون کەردی پەی
تۆماری ئیخلاس ئیرادەت بی تەی
ڕووسیای مەحفەل جەرگەی یاران بیم
شەرمەندەی مەجلیس بادە خواران بیم
دڵ حازر نییەن پەی زکر زاتم
پەشێوەن یەکسەر نەفی و ئیسباتم
دەروونم سەد ساڵ جە حوزوور دوورەن
چرای جەزبەی حەق دڵم بێ نوورەن
فیدات بام، ها من کارم تەمامەن
واچە نەفع تۆ جەی کارە کامەن
ئەر زەڕەی مەیلت هەن جە دەرووندا
مەگرەوی وە حاڵ جەستەی زەبووندا
مەواچی تاهیر زووخاو کوشتەمەن
سەرتاپا وە ڕەنگ ئیخلاس ڕەشتەمەن
من ژاراو هجر، دڵبەر پێش نۆشام
من قەبای مەینەت وە باڵاش پۆشام
کارێ کە ستەم من وە ئەو کەردەن
هیچ فەرەنگ وەڕای ئیسلام ناوەردەن