hamderdan nîyen
From the Book:
Hewargey Diɫan
By:
Seyyed Taher Hashemi (1915-1991)
4 minutes
621 views
hamderdan nîyen ...
wêney min meḧrûm ce dewran nîyen
cismim ne xemîr ḧîrman xelq bîyen
řoḧim we meḧrûm ne qałb şîyen
hesarey tałem na’umêdîyen
çûn min na’umîd, kesê key dîyen?
hîç ’aşiq nebê, we ke łiposewe
çûn min bilerzo, we me’yosewe
hîç mecnûn nebê neduceylewe
bê maye dûr bo ce koy leylewe
hîç ferhad nebê we ḧezînewe
nedyo ladê meyl ce şîrînewe
çen şewan ta řo, ئاە û nałem kerd
we qapî yezdan şifa û lałem kerd
gêłam ne ałem we bê mena û xewf
yekyek asaney pîran kerdim tewf
watim mer şoran řeng meḧrûmîm
hordaran ce dûş lung mezłûmîm
ce kecî bextim faydeş nekerd
’aqîbet mendim çenî bar derd
badey meḧrûmîm, lacur’e noşa
berg mezłûmîm ne bała poşa
çenî suweyday diłey tengewe
hîç nemam we teng nam û nengewe
wêm perê wêm saz bednamî jendim
wêm řîşey danş, ’eqił widîn kendim
wêm gêłam bêdî, wêney sersaman
xestey zûx zam ce ser ta daman
ser ta pam suftey nayrey derden
mayey tesselîm, her î çen ferden
key diłber çenîm ḧeqnenas mebî?
eger bêbeynet wadeş řas mebî
bêbeynet weytewryanem xapûr kerd
bê dîn diłber, dîdem bê nûr kerd
bêbeynet tîrim berd ne toy diłda
bêbeynet cergim da be serçiłda
bêbeynet çun şêt řû ew herdim da
bêbeynet ne cay dewa derdim da
bêbeynet ce dîn danş cyam kerd
bêbeynet řisway dewr dinyam kerd
bê beynet we qewł wêş da firîwim
jaraw ḧîrman kerd we nisîwim
bêbeynet ayr mewist ew yanem
bêbeynet çûn qeys mekerd dêwanem
bêbeynet kałay xem girt we bałam
bêbeynet dûr kerd ce qapî wałam
bêbeynet ya řeb xatirş şad bo
bêbeynet ya ḧey ’umirş zyad bo
peyçî nepersay, peyçî nepersay
bêbeynet ḧałim peyçî nepersay?
ladê ce ẍezew xuda netersay
xakim be dehen, meger to tersay?
meger min qatił îmam ḧuseyn bîm
meger munafq piř keyd û şeyn bîm?
meger hamřefêq îbnû’ubeyn bîm
mer nimek ḧeram dermał key bîm?
mer fîtney dewran zadey ḧîkem bîm
mer weyşûmey şûm îbnûmulcem bîm?
mer cerg ḧemze ce ẍîret cawam
ya «sin» şerîf ḧezret şikawam?
mer cigergoşey peyẍember kuştim
pence we hûnaw îmaman řeştim?
mer ebû lu’loy dûr ce îman bîm
ya hûn naḧeq îbnu’efan bîm?
bira, çi teqsîr tawanim çêş bî
peyçî to ce min xatirit řêş bî?
min tom we çeşmey řeḧmet mezana
min tom we mayey sefwet mewana
watim canşîn qutib walanî
xelîfey we ḧeq ẍews beẍdanî
nezanam weytewr meyl we cengenî
çun dewran, çenî min dû řengenî
řeḧimit bî we tîrşî we derûnda
sefat çûn zułmet min berd we tûnda
cyatî we meyl bigîrî destim
herwêt day we cewr meynet şikestim
ax qîblem min çend umêdim pêt bê
nezanam pêse meynet xidêt bê
şîşey arezûm meřdî we sengida
cergim day we nêş mewday xedengida
lung gumřahî westî ne pêłim
kerdî neřagey terîqet wêłim
şerit û ’ehd û beyn, gişt ce yad berdî
min řisway alem ḧeqîqet kerdî
řiştey řabîtey derûn kerdî pey
tomarî îxlas îradet bî tey
řûsyay meḧfel cergey yaran bîm
şermendey meclîs bade xwaran bîm
dił ḧazir nîyen pey zikir zatim
peşêwen yekser nefî û îsbatim
derûnim sed sał ce ḧuzûr dûren
çiray cezbey ḧeq diłim bê nûren
fîdat bam, ha min karim temamen
waçe nefi’ to cey kare kamen
er zeřey meylit hen ce derûnda
megrewî we ḧał cestey zebûnda
mewaçî tahîr zûxaw kuştemen
sertapa we řeng îxlas řeştemen
min jaraw hicir, diłber pêş noşam
min qebay meynet we bałaş poşam
karê ke sitem min we ew kerden
hîç fereng weřay îslam nawerden