qîblem piř meyl bî
From the Book:
Hewargey Diɫan
By:
Seyyed Taher Hashemi (1915-1991)
2 minutes
819 views
qîblem piř meyl bî ...
diłit ce te’sîr diłim piřmeyl bî
min e’zam ce wesif mecnûnî keyl bî
to hestît mecme’ sifat leyl bî
min henasem tem serkoy duceyl bî
to gonat řiştey pirşey suweyl bî
îşarey dîdet, dîn mekerdiẍaret
xusûs er be wesił meda îşaret
ẍemzey ẍezew xot, mêhryarîş bê
dû dîdey şeřcot, wefadarîş bê
min ce dûr perêt tase mewerdim
gyan wineyr seyr bałat mekerdim
her wext minmanay le’il mey famim
awmeza nedem diłey nakamim
katê cîlwey weş tawwisî tarit
şewq meda ne dił xestey xembarit
wext xeramay sewł zeřîn terz
nałem pey bałay ałat mewî berz
er gahê ’îşwet çenîm tał mebî
ewdî zindegîm cê betał mebî
wextê zułf meday we çing şane
min perêş byam deyrî û dêwane
wext surmesay dû dîdey sêweng
bext wêm medîm wêney şewe zeng
wextê xałeket saf piřcela bê
dił xaster we derd to mubteła bê
sewday suweydam, yekser peyda bî
diłey dêwanem xaster şeyda bî
er seba xendey ẍunçet meşkawa
çûn bułbuł nałem we’erş meyawa
çûn mexseł meday ew gonay gułbêz
zerîfter ayr ’işqim mebî têz
wey destûr, eyam çenît mewyaram
wîsał bałat, weçem medaram
nezanam meynet hane kemînda
medero şîşem we seng kînda
mewaro terzey sitem nebaxim
ẍunçe mesparo we dest zaxim
ax! ce sewday to, meynet mayey wêm
meřemo wicûd wêm ce sayey wêm
dił ce min melûl, min cew herasan
’eqił û hoş û fam ce lam tewasan
çêşen, ke qîblem řas çûn kecbazan
ce min dûrîş kerd, we řeqîb sazan
ew serweş cemey weşî û sełamet
min çenî zûxaw derdu mełamet