bêbeynet wes bo
From the Book:
Hewargey Diɫan
By:
Seyyed Taher Hashemi (1915-1991)
1 minutes
499 views
bêbeynet wes bo ...
sa tuxuda cefat çenî min wes bo
meşyo to meylit çenî nakes bo
min ce gułzarit nesîbim xes bo
bo to, bew şêwe y ḧeq şerîf kerdet
bew ’ehd û peyman ta ser neberdet
bew wadey xelaf meynet efzay wêt
bew mîhir û mobet ce min biřyay wêt
waçe pêm, çêş bî teqsîrat min?
wey destûr kerdî xem xełat min
her kes şerit wibeyn ew ser neberden
memano qîblem, deyniş we gerden
key min sizawar řenc û siza bîm
key min şaystey ḧebis û ceza bîm?
taney bedkaran kerdî we barim
ce sitarey se’d, dûr kerdî çarim
ax min û ayr to giřsende wêm
şemał, bûł we ser banan şende wêm
perdey ’eyb wi’ar sed ca diřyay wêm
dûdes ce daman umêd biřyay wêm
perwanan asa wegiř siftey wêm
wêney şem’ şew soznesiriftey wêm
fidat bam, zułmê to we min kerden
fereng we řagey îslam nawirden