نامەی عاشق بۆ یار
از کتاب:
هەوارگەی دڵان
اثر:
سید طاهر هاشمی (1915-1991)
2 دقیقه
753 مشاهده
پەنا ئاوەردم ...
قیبلەم، من بە تۆ پەنا ئاوەردم
واتم مەر عەلاج بکەری دەردم
گەرم نە بۆ بازار هەناسەی سەردم
هەر چەند دەوا بەخش ئازاران تۆنی
شادی سەفای دڵ، ئەو گاران تۆنی
بەڵام بەخت وێم وەیتەور کەرد وەدی
پەنەم، ئازاب و ڕەنج سەرمەدی
وەرنە کەی ڕەقیب خاوەن ئیخلاسەن
کەی پەرێ جای ڕەحم مرووەت خاسەن؟
جە کۆ بەدکاریش مەبۆ فەرامۆش
کەی وە قسەی تۆ جارێ مەدۆ گۆش؟
عەرز کەردم بەڵکەم نوقم بەڵا بۆ
نەک یەکجار ڕازم گشت بەرمەڵا بۆ
بەڵێ واچە پێم هەی جای نیازم
پەی چێش مەیلت هەن وە ئیفشای ڕازم؟
مالوومەن جەی دەور زەمانەی دنیا
هیچکەس بە زۆر، کەس نەکەرد ئاشنا
کەی مەبۆ جە بەد، هەرگیز کار نیک
خوەرکەی بەرمەیۆ جە شەو تاریک؟
کەی کەس مۆڵەت دی جە پەنجەی ئەجەل
کێ شیرینیش چەشت جە تاڵی حەنزەل؟
بەدکاران دایم بەد کارشانەن
پەیوەست ئارەزووی ئازارشانەن
گا وە هەڕەشە و، گا وە قسەی خوەش
بەدتەر نە جاران بەد مەبۆسەرکەش
ئەرنمەکەری چێگە تەبعیدش
جە بەد زبانی دڵ نا ئومیدش
زام دەروونم با هەر کۆنە بۆ
دێزەی ڕازانم هەر دەرخۆنە بۆ
وەر نە بسمیللا، بکەر نگوونش
بکەرە وەنێش مەینەت زەبوونش
ڕەقیب ئەو خاسەن، جە ئێمە دوور بۆ
ئازاش وە قولاب مەینەت ڕەنجووربۆ
فەرما بێت دووروا تەو و لەرزتەن
چون من زایەڵەی هەزار تەرزتەن
لەرزت سەردی بەخت، تەوت گەرمی عەشق
بەڵێ، هەر سەودای عەشق مەکەری مەشق
شیرینی شەکەر، بۆسەی لەعل یار
دوور کەرۆت جە تەن سەفرای نا گەوار
مەسپارووت وە عشق تاسەی بێحەدم
دوور بای جە ئازار بەدبەختی بەدم
یاحەی، خوداوەند بدەرۆشفات
دوورکەرۆت جە ڕەنج، ئازار و شقات