namey ’aşiq bo yar
From the Book:
Hewargey Diɫan
By:
Seyyed Taher Hashemi (1915-1991)
2 minutes
789 views
pena awerdim ...
qîblem, min be to pena awerdim
watim mer ’elac bikerî derdim
germ ne bo bazar henasey serdim
her çend dewa bexiş azaran tonî
şadî sefay dił, ew garan tonî
bełam bext wêm weytewr kerd wedî
penem, azab û řenc sermedî
werne key řeqîb xawen îxlasen
key perê cay řeḧim miruwet xasen?
ce ko bedkarîş mebo feramoş
key we qisey to carê medo goş?
’erz kerdim bełkem nuqim beła bo
nek yekcar řazim gişt bermeła bo
bełê waçe pêm hey cay nyazim
pey çêş meylit hen we îfşay řazim?
malûmen cey dewr zemaney dinya
hîçkes be zor, kes nekerd aşna
key mebo ce bed, hergîz kar nîk
xwerkey bermeyo ce şew tarîk?
key kes mołet dî ce pencey ecel
kê şîrînîş çeşt ce tałî ḧenzel?
bedkaran daym bed karşanen
peywest arezûy azarşanen
ga we heřeşe û, ga we qisey xweş
bedter ne caran bed meboserkeş
ernimekerî çêge teb’îdiş
ce bed zibanî dił na umîdiş
zam derûnim ba her kone bo
dêzey řazanim her derxone bo
wer ne bismîlla, biker nigûnş
bikere wenêş meynet zebûnş
řeqîb ew xasen, ce ême dûr bo
azaş we qulab meynet řencûrbo
ferma bêt dûrwa tew û lerizten
çun min zayełey hezar terizten
lerizit serdî bext, tewt germî ’eşq
bełê, her sewday ’eşq mekerî meşq
şîrînî şeker, bosey le’il yar
dûr kerot ce ten sefray na gewar
mesparût we ’işq tasey bêḧedim
dûr bay ce azar bedbextî bedim
yaḧey, xudawend bideroşfat
dûrkerot ce řenc, azar û şiqat