wełamî yar be namey ’aşiq
From the Book:
Hewargey Diɫan
By:
Seyyed Taher Hashemi (1915-1991)
3 minutes
662 views
er’ey meynet kêş, xatir piřcexar
er’ey derûnřêş, xestey dił ewgar
er ey ce hîcran şewan nexefte
er’ey êş zam derûn nesrefte
erê ey ḧezîn, peşêw matem
er’ey sewdayî řisway gişt ałem
er’ey çûn mecnûn lung xem we pêł
er’ey çûn ferhad şêt bîdî gêł
er’ey sifte peř wêney perwane
er’ey era gêł, lêwey dêwane
er ey çûn bułbuł mest şeyday guł
sed daxan ce nêş mewday xarne dił
zûx zam derd, dûrî min werde
mekan nezaxan, mawa ne herde
derd û cefakêş, wefa perwerde
şew nepay kawan weřo awerde
be ter ce mecnûn ’ebdał bêberg
daym we ayr’eşqim sifte cerg
namey xembarît yawa we lay min
çûn dît ser nya ne xakpay min
çiman jinde bî, seyrmekerd bałam
me kêşa ne çem gerd pa û pałam
ya xeyr ’eşq to zor awerde bê
ewîç bew adab talîm kerdebê
werne key kaẍez zîndegî daro
key gyan neřagey meḧbûb mesparo?
welḧasił wendim şîrîn nameket
seyr kerdim nigarřeşḧey xameket
xetit çûn zułfan wêm piř şikenc bê
namet çûn nazim, piřlare û lenc bê
cewnamey bo weş şox ferzane
çiman zułf min kerdebêt şane
lefiz û me’naş xas ce hem cya bê
řesimş çun tuẍray zułfim tata bê
boy ’etirş wêney muşk tatarî
mebexşa nefḧey ’ûd qumarî
wate bêt çendên tewu lerizten
herdem ce sewdam, nałey berizten
goya serdî meyl min çenît germen
cew bone nałe û lerizit bêşermen
dîsan hem ayr derûnekey wêt
tew wişerarey diłsozen perît
cewdima şifat pey ḧasił bîyen
ew tew ce derûn siftet berşyen
bełam meyl min, ce lat wetaqî
dimay tew û lerzihermenden baqî
temam ḧałî bîm mezmûn ferdit
zanam kizey sext sermayey derdit
ne xeyr, ce lay min meylit serd nîyen
ce yadim peyman werîn neşîyen
min şay şîrîn tewr wefadaranim
meḧkemen çenît ’ehd û peymanim
řesim wiřay wefa wecamawerûn
şew wiřoperêt xefet mewerûn
er nisîw nîyen ce sefa wiseyrit
nîyen kotayîm ce do’ay xeyrit
naz dûdîdey şoxim yarit bo
ẍemzey şîrînim nigadarit bo
zułfim merhem bo pey şifay zamit
řazim şerbet bo pey tełxî kamit
xendem bikero’elac zarît
qisem tebîb bo pey derd ewgarît
erwa çî ce to hewał ne persam
bełê, ce taney bedkaran tersam
pey çêş? bedkaran şerîr weyşûm
we cext megêłan nepey abřûm
werne perê to er’ey sewdayî
diłşadim we ’işq, řutbey leylayî
pey to mecnûnî firawan xeylê
wenam zyaden xaster ce leylî
ana kyastim cwaw namet
to û naz û ’îşwey dîdem selamet