namey diłber bo diłdar
From the Book:
Hewargey Diɫan
By:
Seyyed Taher Hashemi (1915-1991)
5 minutes
914 views
er’ey dił hûnîn, ten ce meynet řêş
er’ey çem bêxaw, şewbêdarî kêş
er’ey çûn mecnûn kosaran menził
erê ey daxmay dûrî leyl ne dił
er’ey şehir’aşoy řisway zemane
er’ey eragêł, şeyday dêwane
erê ey ser’î, sersamî sadar
erê ey xatir peř ce mewday xar
erê ey badey mobet newerde
er’ey şerit û beyn ta ser neberde
erê ey ’aşiq bejin newhałan
erê ey salar ahûxeyałan
erê ey medhoş, hoş cê řemîde
her satê kesê pey dos guzîde
yeçêş bî beynet ta ser neberdî
şerit û wefa û meyl feramoş kerdî
mer herkes çûn to ce kes netersen
ce me’şûq wêş hewał nepersen?
mer wêney fełek karit warûnen?
ne persay diłber xemkêşim çûnen
mer ezeł beynet nesîbit nebî
we destûr perway ḧebîbit nebî
mer cam şerab wefa nenoşay
meger xerqey ’işq neten nepoşay?
mer neşneftî deng muẍbeçey meynoş
çun sen’an naqûs newstî ne doş?
mer nenyay sermes řûne meyxane
nekêşay taney xwêş û bêgane?
mer çun def nebît berg meynet poş
ḧełqey ẍułamî nekerdî ne goş?
mer ser hełqey cem meynoşan nebît
mer şem’ meclîs xamoşan nebît?
mer dîn tersat îxtyar nebî
meger gerdenit ne zunnarnebî?
meger cařûkêş meyxane nebît
pey şem řuxsaran perwane nebît?
îse yeçêşen dił ce sengenî?
her xerîk ḧifiz nam winengenî
’aşiq kesêwen ey yar yekřeng
bimařo ewwel şîşey nam û neng
berz bone ’alem saz şeyda’îş
bişnewan merdim řazřisiwa’îş
peşêwter ce zułf leylê lêwe bo
medhoş bednam, mecnûn şêwe bo
bigêło çenî ’ebdałan beř
lêwiş ẍeyr be aw esrîn nebo teř
yanê ce dûrî min meylit serden
mewa çî ’ehdim feramoş kerden?
zeřey meyl to celam nîyen kem
zyadtermebo, hersat wiherdem
qurs řuxsarim yaqût mebêza
řuxsarim řêzey şerbet meřêza
îse zerd teren ce karebay zerd
tałen guftarim, ce daxmay derd
ewend kêşanim ser kone û tane
sifte bałe nan wêney perwane
mewaçan penem beynet betałan
tane medan lêm nezan hewałan
bazhem nekêşam zeřřey nedamet
wêm kerd serejan herta qyamet
ẍemim hamşerîk, ḧesretim hamdem
ahim hemzanû, esrînim meḧrem
kon ew sam û zor bê bakî û merdît
kon ew wefa û meyl sara newerdît?
be wêney xusrew salar serkeş
ce sewday şîrîn řemkêş mehweş
hîç nime tersay ce me’reke û hey
çend şewan řagey çol mekerdî tey
taney dujminan gewara kerdî
kerdî weser meşq, şêwey çolgerdî
zeřey netersay ce şêr cengî
ce bebir şeřxêz piřsam sengî
er pencet meda ne mewday xara
ermeşî nepat sed xar new sara
pêse mezanay guł û gułzaren
ya ferş kałay bisat yaren
pey to ’eyş winoş ey yardêrîn
xembarî pey kî? pey diłey ḧezîn
ane nîşaney germî meylit bî
dûdî sewday dił ce xem keylit bî
îse bê meylît kerdin be ’adet
şyenit ce yad řewyey ’yadet
kifren ne mezheb ga ne pêwarê
bipersî hewał ce azardarê
ełła, çend cefay řeqîban kêşam
çend xatir we tîr bedgoyan êşam
çendê derûnim ce hûnaw bî keyl
çend cam jaraw dûrît kerdim meyl
çendê wêney zułf aşuftey şemał
nîştim ce dûrît we perêşan ḧał
çend şewan giryam min be nehanî
çem neřûy zemîn des ne ziranî
watim mer carê barî we yadim
nekeno yekcar meynet bunyadim
dek bêbeła bay fayde nekerd
hermendim çenî nałey dax widerd
îne şerḧ ḧał diłey xembaren
bwaneş be şewq, şifay bîmaren
diłřence meberce nêş û noşim
dîdim we dîdet, yekcar bêhoşim
bibexşem teqsîr er ḧerfim tałen
derûnim ce dax dûrît zuxałen
namem wêney zułf wêm piřişkencen
beḧis û serguzeşt, macera û řencen
bikêşe nazim carê çûn caran
wacbe n kêşay naz nazaran
dîsan be nîkî bed neyo weřêt
bikyane perîm weşhewałî wêt
bełkem ta çendê şifay zamim bo
nîşaney nîkî ser’encamim bo
bînayî weřas herdû dîdem bo
aram bexiş dił cê řemîdem bo
baqî weselam, ey mayey derdim
řojê sed caran we fidat gerdim