wełamî diłdar bo namey diłber
From the Book:
Hewargey Diɫan
By:
Seyyed Taher Hashemi (1915-1991)
6 minutes
712 views
er’ey şekerřaz xałan ’enberîn
er’ey gułẍunçey beheşt berîn
er’ey kanî ḧusin, xet û xał û nexiş
er’ey melekweş, firîştey feř bexiş
er’ey gułřuxsar, zułf destey sunbul
muselsel çîn çîn, silsiley pay dił
erê ey řemkêş, ahûy xuten gêł
weḧşî pay herdan muşkinaf we pêł
daym ne gułgeşt herde we herde
şew xaw nedîdey seyadan berde
erê ey terlan şabaz serkeş
se’wey diłan gîr ’işwe û lare xweş
er’ey xeyałan we esîrberde
nîmnîgat qetał îmaman kerde
erê ey sermest cur’ey bade noş
er’ey ẍaretger ’eqił û fam wihoş
sende bew nîgay turfe ẍezałe
ce zahîd, ta’et hezaran sałe
er’ey çepawger tewana wişekîb
bewdîdey sêweng ’abdan ferîb
er’ey terîdey řay xeyałan gîr
erê ey cerdey qafłey fam û wîr
kogay taqetan berde û tarac
be ẍemze sende ce siltanan bac
er’ey we mujgan pay diłan peyker
yaney ’aşiqan we çepey ney ker
nazit ferş hoş derdînan tey ker
’îşwet wiłatan we deşt řey ker
hîçkes ce mewday mujet neřeste
çend hûnî naḧeq negerden weste
erê ey tûtî şekerxay qend bêz
şîrîn neẍme û deng şîrey şerbet řêz
dîde dîdey ceyr řewêłey herdan
seyadan perêt lêwe û sergerdan
payendaz pat, gułan sed xermen
kemter kenîzit şîrîn ermen
safî çeşmey nûr nûşîn badey noş
daym teřdemaẍ ce sehbay sercoş
leylê û guł’endam, şîrîn samekem
’ezray مەە ’uzar, weş kelamekem
nergisboy weş terz, wenewşey çemen
pay êłaxan gêł, şetawan mesken
cey serwexteda, şîrîn nameket
yawa pey şifay xestey zameket
nałam û bosam be giryanewe
be qirçey derûn çûn biryanewe
dyam bew namey bo ’ebîrînda
bew înşay feřbexiş tirş û şîrînda
bew şehd û şereng sirke û ’eselda
bew derd û dewa û, qend wiḧenzelda
bełê ce zumrey pêşînan pêş
kes mizûc nekerd, beytewr noş û nêş
fiday destit bam hey şîrîn xame
ye çon bî kerdî înşay î name?
serim siřmenden bey guftarewe
bey namey fesîḧ şekerbarewe
sed seḧban bendey fesaḧetit bo
ya ḧey we bêřenc, her řaḧetit bo
bełam hey serkeş, şems zeřřîn bał
zeř sitûn, qamet şîrîn xet wixał
nimez, ẍeyr ce ’işq çêşen teqsîrim?
mekerî weytewr xeste û zwêrim
mer her kes çun to şekerîn baren
guftarş çenî derdînan jaren?
meger meḧbûban pîşeşan cewerin
karşan çenî ’aşiq wey tewren?
merher kes çun to dîde sêwengen
çenî ’aşiqan meyliş we cengen?
mer herkes piřnaz, ’enberîn baren
lefiz û mobetiş, her qîn û qaren?
fermabît bew lefiz şekerřêzewe
bew’îşwey şîrîn dił’awêzewe
goya ce ḧenat, xałan la cîwerd
xuda ne xwaste meylim bîyen serd
sewgend bew xuday bêhemtay mutłeq
bew nałey bîmar wadey sub şeweq
bew kizey nesîm şinoy seḧerxêz
bewhajey şemał wełg gułan řêz
bew neẍmey bułbuł cîlwey celay guł
bew pêç û şiken silsiley sunbuł
bew ’etir nergis ne pay wefrawan
bew wenewşey şox ne gwê şetawan
bew esir dîdey ’aşiqan zar
bew řeng zayf xestey dił’ewgar
bew naz şeřxêz şoxîy şêweket
bew zułf piřçîn lûl lêweket
bew pîşanî saf ce nûrsiriştet
bew ebroy sêweng bê qetran řeştet
bew kirşime û naz dîdey şehlay to
bew xendey melîḧ loloy lalay to
be durc ’eqîq piřcelal to
bew zengî beçey nuxtey xał to
bew bałay sehî têr’aw werdey çem
çend kes ce ẍem kerd be wêney min xem
be wefa û beynet şerit û meyleket
bew řûmet mang zułf leyleket
bey řûy piř ce zam be hûnaw řeştem
bey berg nîlî xem pêda weştem
dił her cařûkeş asanekey ton
keftey sifte bał perwanekey ton
min ceřoy ezeł new dawa wicengida
şîşey nam wineng meřdim we sengida
bîm we cay taney qewman û xwêşan
çûn destey çîn çîn zułifit perêşan
çûn sen’an xerqey tersayîm poşa
zuhd çend sałem be mifit firoşa
ta şineftim sewt muẍbeçey meykeş
ce ’eşq to bîm bê bade serxiweş
wistim perê tozunnar ne gerden
řazim ne bazař ’alem bêperden
îseyç, cařûkeş meyxaney yarim
kemîn durd aşam mest xemmarim
mestî û şeydayîm meşhûr şaren
muḧteseb ce dîn dîdem bêzaren
çûn qedeḧ, ḧeyran dîdey yarenan
perê cur’ey mey întizarenan
canifday we řas, hełqe negoşim
dełqî sed pîney îradet poşim
cergim ce sewday dûrît medokuł
mekero wêney suraḧî quł quł
menałûn her şew, çûn derdedaran
mejnewun be goş, taney bedkaran
er ebrot miḧrab diłey derdînen
xatir herce dax dûrît ḧezînen
ga de’way bê sûd nuktedanîmen
çun sosen aheng de zebanîmen
ga çûn benefşe, ser’efkendenan
ga wêney nergis, xicił mendenan
ga çûn şeqayq, ce esrîn xicił
ga çûn gułałan, sed daxan ne dił
beter ce mecnûn serkawan gêłim
weytewr mewînan perê to wêłim
ne qeys, ne wamq, ne ferhad zar
ne şêx, ne behram, řamînî xembar
hîçkam wêney min xatir teng nebîn
gîrodey diłber, dił ce seng nebîn
ałem ḧeyranen ce yekřengî min
ce nałey piřsoz xatirtengî min
çûn mecnûn ce taw hîcran leyla
daym xidêmen şîn û waweyla
ta řoy qyamet her canifdatim
kemterîn ẍułam ẍubar patim
êden şerḧî ḧał derd cyayîm
baqî weselam nûr bînayîm