وەڵامی دڵدار بۆ نامەی دڵبەر
از کتاب:
هەوارگەی دڵان
اثر:
سید طاهر هاشمی (1915-1991)
6 دقیقه
924 مشاهده
ئەرئەی شەکەرڕاز خاڵان عەنبەرین
ئەرئەی گوڵغونچەی بەهەشت بەرین
ئەرئەی کانی حوسن، خەت و خاڵ و نەخش
ئەرئەی مەلەکوەش، فریشتەی فەڕ بەخش
ئەرئەی گوڵڕوخسار، زوڵف دەستەی سونبول
موسەلسەل چین چین، سلسلەی پای دڵ
ئەرێ ئەی ڕەمکێش، ئاهووی خوتەن گێڵ
وەحشی پای هەردان موشکناف وە پێڵ
دایم نە گوڵگەشت هەردە وە هەردە
شەو خاو نەدیدەی سەیادان بەردە
ئەرێ ئەی تەرلان شاباز سەرکەش
سەعوەی دڵان گیر عشوە و لارە خوەش
ئەرئەی خەیاڵان وە ئەسیربەردە
نیمنیگات قەتاڵ ئیمامان کەردە
ئەرێ ئەی سەرمەست جورعەی بادە نۆش
ئەرئەی غارەتگەر عەقڵ و فام وهۆش
سەندە بەو نیگای تورفە غەزاڵە
جە زاهید، تاعەت هەزاران ساڵە
ئەرئەی چەپاوگەر تەوانا وشەکیب
بەودیدەی سێوەنگ عابدان فەریب
ئەرئەی تەریدەی ڕای خەیاڵان گیر
ئەرێ ئەی جەردەی قافڵەی فام و ویر
کۆگای تاقەتان بەردە و تاراج
بە غەمزە سەندە جە سلتانان باج
ئەرئەی وە موژگان پای دڵان پەیکەر
یانەی عاشقان وە چەپەی نەی کەر
نازت فەرش هۆش دەردینان تەی کەر
عیشوەت وڵاتان وە دەشت ڕەی کەر
هیچکەس جە مەودای موژەت نەڕەستە
چەند هوونی ناحەق نەگەردەن وەستە
ئەرێ ئەی تووتی شەکەرخای قەند بێز
شیرین نەغمە و دەنگ شیرەی شەربەت ڕێز
دیدە دیدەی جەیر ڕەوێڵەی هەردان
سەیادان پەرێت لێوە و سەرگەردان
پایەنداز پات، گوڵان سەد خەرمەن
کەمتەر کەنیزت شیرین ئەرمەن
سافی چەشمەی نوور نووشین بادەی نۆش
دایم تەڕدەماغ جە سەهبای سەرجۆش
لەیلێ و گوڵئەندام، شیرین سامەکەم
عەزرای مەە عوزار، وەش کەلامەکەم
نەرگسبۆی وەش تەرز، وەنەوشەی چەمەن
پای ئێڵاخان گێڵ، شەتاوان مەسکەن
جەی سەروەختەدا، شیرین نامەکەت
یاوا پەی شفای خەستەی زامەکەت
ناڵام و بۆسام بە گریانەوە
بە قرچەی دەروون چوون بریانەوە
دیام بەو نامەی بۆ عەبیریندا
بەو ئینشای فەڕبەخش ترش و شیریندا
بەو شەهد و شەرەنگ سرکە و عەسەلدا
بەو دەرد و دەوا و، قەند وحەنزەلدا
بەڵێ جە زومرەی پێشینان پێش
کەس مزووج نەکەرد، بەیتەور نۆش و نێش
فدای دەستت بام هەی شیرین خامە
یە چۆن بی کەردی ئینشای ئی نامە؟
سەرم سڕمەندەن بەی گوفتارەوە
بەی نامەی فەسیح شەکەربارەوە
سەد سەحبان بەندەی فەساحەتت بۆ
یا حەی وە بێڕەنج، هەر ڕاحەتت بۆ
بەڵام هەی سەرکەش، شەمس زەڕڕین باڵ
زەڕ ستوون، قامەت شیرین خەت وخاڵ
نمەز، غەیر جە عشق چێشەن تەقسیرم؟
مەکەری وەیتەور خەستە و زوێرم
مەر هەر کەس چون تۆ شەکەرین بارەن
گوفتارش چەنی دەردینان ژارەن؟
مەگەر مەحبووبان پیشەشان جەوەرن
کارشان چەنی عاشق وەی تەورەن؟
مەرهەر کەس چون تۆ دیدە سێوەنگەن
چەنی عاشقان مەیلش وە جەنگەن؟
مەر هەرکەس پڕناز، عەنبەرین بارەن
لەفز و مۆبەتش، هەر قین و قارەن؟
فەرمابیت بەو لەفز شەکەرڕێزەوە
بەوعیشوەی شیرین دڵئاوێزەوە
گۆیا جە حەنات، خاڵان لا جیوەرد
خودا نە خواستە مەیلم بییەن سەرد
سەوگەند بەو خودای بێهەمتای موتڵەق
بەو ناڵەی بیمار وادەی سوب شەوەق
بەو کزەی نەسیم شنۆی سەحەرخێز
بەوهاژەی شەماڵ وەڵگ گوڵان ڕێز
بەو نەغمەی بوڵبوڵ جیلوەی جەلای گوڵ
بەو پێچ و شکەن سلسلەی سونبوڵ
بەو عەتر نەرگس نە پای وەفراوان
بەو وەنەوشەی شۆخ نە گوێ شەتاوان
بەو ئەسر دیدەی عاشقان زار
بەو ڕەنگ زایف خەستەی دڵئەوگار
بەو ناز شەڕخێز شۆخیی شێوەکەت
بەو زوڵف پڕچین لوول لێوەکەت
بەو پیشانی ساف جە نوورسرشتەت
بەو ئەبرۆی سێوەنگ بێ قەتران ڕەشتەت
بەو کرشمە و ناز دیدەی شەهلای تۆ
بەو خەندەی مەلیح لۆلۆی لالای تۆ
بە دورج عەقیق پڕجەلال تۆ
بەو زەنگی بەچەی نوختەی خاڵ تۆ
بەو باڵای سەهی تێرئاو وەردەی چەم
چەند کەس جە غەم کەرد بە وێنەی من خەم
بە وەفا و بەینەت شەرت و مەیلەکەت
بەو ڕوومەت مانگ زوڵف لەیلەکەت
بەی ڕووی پڕ جە زام بە هووناو ڕەشتەم
بەی بەرگ نیلی خەم پێدا وەشتەم
دڵ هەر جاڕووکەش ئاسانەکەی تۆن
کەفتەی سفتە باڵ پەروانەکەی تۆن
من جەڕۆی ئەزەڵ نەو داوا وجەنگدا
شیشەی نام ونەنگ مەڕدم وە سەنگدا
بیم وە جای تانەی قەومان و خوێشان
چوون دەستەی چین چین زوڵفت پەرێشان
چوون سەنعان خەرقەی تەرساییم پۆشا
زوهد چەند ساڵەم بە مفت فرۆشا
تا شنەفتم سەوت موغبەچەی مەیکەش
جە عەشق تۆ بیم بێ بادە سەرخوەش
وستم پەرێ تۆزوننار نە گەردەن
ڕازم نە بازاڕ عالەم بێپەردەن
ئیسەیچ، جاڕووکەش مەیخانەی یارم
کەمین دورد ئاشام مەست خەممارم
مەستی و شەیداییم مەشهوور شارەن
موحتەسەب جە دین دیدەم بێزارەن
چوون قەدەح، حەیران دیدەی یارەنان
پەرێ جورعەی مەی ئینتزارەنان
جانفدای وە ڕاس، هەڵقە نەگۆشم
دەڵقی سەد پینەی ئیرادەت پۆشم
جەرگم جە سەودای دووریت مەدۆکوڵ
مەکەرۆ وێنەی سوراحی قوڵ قوڵ
مەناڵوون هەر شەو، چوون دەردەداران
مەژنەوون بە گۆش، تانەی بەدکاران
ئەر ئەبرۆت محراب دڵەی دەردینەن
خاتر هەرجە داخ دووریت حەزینەن
گا دەعوای بێ سوود نوکتەدانیمەن
چون سۆسەن ئاهەنگ دە زەبانیمەن
گا چوون بەنەفشە، سەرئەفکەندەنان
گا وێنەی نەرگس، خجڵ مەندەنان
گا چوون شەقایق، جە ئەسرین خجڵ
گا چوون گوڵاڵان، سەد داخان نە دڵ
بەتەر جە مەجنوون سەرکاوان گێڵم
وەیتەور مەوینان پەرێ تۆ وێڵم
نە قەیس، نە وامق، نە فەرهاد زار
نە شێخ، نە بەهرام، ڕامینی خەمبار
هیچکام وێنەی من خاتر تەنگ نەبین
گیرۆدەی دڵبەر، دڵ جە سەنگ نەبین
ئاڵەم حەیرانەن جە یەکڕەنگی من
جە ناڵەی پڕسۆز خاترتەنگی من
چوون مەجنوون جە تاو هیجران لەیلا
دایم خدێمەن شین و واوەیلا
تا ڕۆی قیامەت هەر جانفداتم
کەمتەرین غوڵام غوبار پاتم
ئێدەن شەرحی حاڵ دەرد جیاییم
باقی وەسەلام نوور بیناییم