کا دۆستا زانا
از کتاب:
شەفاق
اثر:
جگرخون (1903-1984)
2 دقیقه
645 مشاهده
دڤێم دل ب دم دۆستەک زانە و ژیر
ئەڤیندار و خوەدی باوەر، خوەدی بیر
گەلەک رێزان، گەلەک هۆزان، ب تەدبیر
بەلێ چبکم نەدی من ئەو، نەدی من
چقاس چاڤێن خوە من هاویر گەراندن
پیێن خوە من د ڤێ رێدە دراندن
مە کنجێ: سەبر و سامانان چراندن
بەلێ چبکم نەدی من ئەو، نەدی من
مە: شاش و جببە ئاڤێتن ژ دەردان
مە ئۆلا خوە، مە مالێ خوە ب دەردان
مە جان و دل دڤێ رێدە ل سەر دان
بەلێ چبکم نەدی من ئەو، نەدی من
هەیە چل سال کو ئەز هاویر دبازم
ل شام پ هەم ل بەخدا ئەز دگازم
شەڤ و رۆژان دنالم دەڤ ژ سازم
بەلێ چبکم نەدی من ئەو، نەدی من
ل ئەزمانان د سەر هەورانڤە ئەز چووم
ژ ڤی بەختێ منێ رەشتاری و شووم
دکوورم ئەز ل هەر ئالی، وەکی بووم
بەلێ چبکم نەدی من ئەو، نەدی من
وەکی دێوێ سپی گرس و درێژم
ب ڤان رستان گەلەک فۆرتان دبێژم
چ سۆلبەندم، بەلێ ئەز بێ درێژم
بەلێ چبکم نەدی من ئەو، نەدی من
ژ بۆنا خاترێ چاڤێن تەیێن رەش
ژ بۆ بگهێم ئەوان دێمێن تەیێن گەش
ژ بۆ ماچێن دەڤ و لێڤێن تەیێن خوەش
بەلێ چبکم نەدی من ئەو، نەدی من
ل کەرکووک و ل واشۆخان و ئامەد
ل بەرمایێن: مەتین و هۆری و مەد
مە گۆ: بەلکی ببێنم ئەز شرینقەد
بەلێ چبکم نەدی من ئەو، نەدی من
سەرێ من بوو سپی، بەرفا زنارا
کو پیری هات، جوانی ما ژ پارا
ب من پاییز گهشت و چوو بهارا
بەلێ چبکم نەدی من ئەو، نەدی من
دخوازم ئەز، ببێنم یارێ شێرین
وەکوو مەم ئەز دنالم تم ل سەر زین
وەکی مەجنوون ل سەر لەیلا جگەرخوین
بەلێ چبکم نەدی من ئەو، نەدی من