٢٥
تان و پۆی ژیانی مامز لەبەر یەک بڵاو ببوو... هەستی دەکرد بۆتە بابردەڵەیەکی یەخسیری دەستی زریانی چارەنووس. شەوەزەنگێکی بەسام ئاسمانی تەمەنی کاڵ و ساوای داپۆشیبوو، بەڵام وێڕای ئەوەش، لە دوور، لە سووچێکی ئەو ئاسمانەدا جارجارە جریوەی کزەئەستێرەیەکی دەدی. ئەو سۆمایییە ببوو بە هۆی هیوایەک بۆ ئەو. هیوای تێکشکاندنی ڕکەی دیلی و کۆیلەیی... هیوای ڕزگاری لە ژیانی ئاسایی و ڕۆیین بەرەو ئامانجێکی پیرۆز کە دەبوو بە هۆی نەمانی زوڵم و زۆر و دامەزرانی کۆمەڵێکی پێشکەوتوو کە لەودا کیژان فیدای هەوەسی هەوەسبازان نەکرێن و مافیان لەبەرچاو بگیرێ.
وریا دیمەنی جوان و دڵڕفێنی ئەو کۆمەڵەی پێشان دابوو و ڕێگاکەشی فێر کردبوو: تێگەیشتن، زانین، دەست لە هیوا بەرنەدان، خەبات، بەربەرەکانی، ڕاوەستان، کۆڵنەدان، ماندوو نەبوون و... .
ڕۆژی پێنجشەممۆ لە دوو ماڵی کوێخا ئەمەر و حەمەدەمپەلدا چەند سەرەژن خەریکی نان و چێشتی زەماوەند بوون. لە مەیدانی بەر مزگەوتدا دەهۆڵ و زوڕنایان لێدەدا و چەند کیژ و کوڕ هەڵدەپەڕین، بەڵام دیار بوو ئەو هەڵپەڕکێ و گۆوەندە لەگەڵ زەماوەند و هەڵپەڕینی دیکە جیاوازە. لاوەکان بیریان لە وریای نامراد دەکردەوە. لێیان سوور بوو کە وریا بە پیلانی کوێخا ئەمەر و حەمەدەمپەل کوژراوە. هەرچەند خۆیان فریو دەدا کە تازە وریا زیندوو نابێتەوە، ژن بە ژنە کراوە و هەڵناوەشێتەوە، بەڵام هەستیان دەکرد کە بە دڵ نەهاتوونە زەماوەند. گۆوەند زۆر سارد و خاو دەگەڕا. ژنان بە دڵ خەمیی مامز و تارایان بوو. دڵخۆشییان دەدانەوە و یەکیەکەش خۆیان پێڕانەدەگیرا و فرمێسکیان بە چاودا دەهاتە خوار... .
مامز و تارا لەسەر بڕیاری خۆیان سوور بوون و هەر کام چەقۆیەکی تیژی دەبەر پشتێندی نابوو و لەگەڵ خۆی دەیگێڕا... .
لە سووچێکی، ئاسۆ لەگەڵ «شینە» و «لاوێن» کە پێکەوە چووبوونە دۆڵەشین، نیگەرانی داهاتوو بوون. شینە گوتی:
- کاک ئاسۆ کەنگێ بە کوڕەکان بڵێین؟
- وردەوردە خەریک دەبین.
لاوێن پرسی:
- بە کێ و کێ بڵێین؟
- بە گشتیان.
- دە با دەست پێبکەین.
ئەمجا یەک یەک و دوو دوو هاوڕێیەکانیان بانگ کرد و سرتەیان لەگەڵ کردن. هەموو پێیان سەیر بوو. دەیانپرسی:
- بەڕاستیتانە...، وریا ماوە...، مامز دەزانێ...؟ حەمەدەمپەلیش جاشە...؟
نەختەنەختە تەواوی هاوڕێیەکانیان تێگەیشتن و زانیان دەبێ چ بکەن. لە خۆیان دەپرسی:
- ئاخۆ چۆن دەبێ...؟ مامز و تارا دەبێ چ بکەن...؟
گۆوەند وەک سەعاتێک پێش ساردوسڕ نەبوو، کەمکەمە گەرمتر و گشتتر دەبوو. لاوەکان دڵساردی و بێوازیی تاوێک لەوەوبەریان نەمابوو. ئێستا شادییان لە دڵدا دەگەڕا. دەستی ڕەشبەڵەکیان گرتبوو و بە هەوایەکی گشت هەڵدەپەڕین و چاوەڕوانی دوای نیوەڕۆ بوون...