لە عێراق کوودەتا کراوە!
تەواو لەو ژیانە بێتامە و ئەم شەڕە چەققەی شیووعی و بێکاری و سەرباری خۆم وەڕەز ببووم. هیچ هومێدیشم بە هیچ نەمابوو. بڕیارم دا بە ماڵەوە بچمە میسر و حەولی شاگرد عەکاسی بدەم و هەژاری خۆم بکەم و کەس نەمناسێ. هەر دەو فکرانەدا بووم، شەو ڕادیۆ بەغدا خەبەری دا کە سبەی نووری سەعید و مەلیک دەچنە تورکیە. بەیانی مەعسووم گوتی: بۆ ڕادیۆ ناکەیەوە؟
- ڕادیۆی چی؟ ئەو سەگبابانە دەچنە تورکیە داخوا چ داوێک بۆ کورد دەنێنەوە.
کردمەوە مووزیکی مارش بوو، بەستم.
- ها نەمگوت؟ ئەوە خەریکن دەفڕن.
قەسابێکی عەبدۆ ناو، عەرەبی حەڵەبی کە سی ساڵێک بوو لە تربەسپی قەسابی دەکرد و کوردیش باش فێر ببوو، لە حەسار وەژوور کەوت و بە لرفە و هەڵپەوە پیلی کێشام:
- وەرە بڕەقسین! مەلیک و نووری سەعید کوژران و کوودەتا کراوە.
ڕادیۆ دەکەمەوە، ڕاستە. قەدرێک دەگەڵ عەبدۆ ڕەقسیم. خۆم گەیاندە شام: دەی کاکە با بڕۆینەوە بەغدا. پۆلیس گوتی: تۆ دەبێ لە قامیشلی پاسپۆرتت تازە کەیەوە، یان نەقڵی مەسکەن بکەی بۆ شام. ئەها دیسان وەک پێناسەکەم دەبێ شەش مانگ تۆز بخۆم و ماندوو بم؛ جا دەمدەنێ یان نامدەنێ. لای کوردێکی شامی ئاشنا ئەو دەردە دڵەم کرد؛ گوتی: بەینی خۆم و خۆت بێ، بچۆ ئیدارەی بەرزی ئەمنی عام، بڵێ سەرهەنگ عەبدولقادرم دەوێ. پێی بڵێ عەبدولقادر ناردوومی؛ کارت بۆ پێک دێنێ.
- جا خۆ تۆ ناوت عەبدولقادر نییە!
- حەقت نەبێ، بچۆ!
لە دەرگای ئەمنی عام گوتم: سەرهەنگ عەبدولقادر؟
- بڕۆ سەرەوە.
بە ئەفسەرێکم گوت.
- دانیشە!
قاوەیان هێنا. گوتیان بڕۆ بیبینە. پیاوێکی کەڵەگەتی چوارشانە، سەر زەلام، چاوڕەشی، برۆ پڕی، سپی و سۆڵ، جووتێک سمێڵی زۆر لەبار.
- چیت دەوێ؟
- عەبدولقادر ناردوومی، ئەوەش کارەکەمە.
- هەر ئەوەندە؟
- بەڵێ.
لە زەنگی دا؛ ئەفسەرێک هاتە ژوور.
- ئەم پاسپۆرتە بەرە تازەی کەوە. بە کامیلی بیهێنەوە، بەڵام زوو.
- بەڵێ قوربان!
باوەڕ کە، دە دەقیقەی نەبرد پاسپۆرتم وەرگرتەوە.
- زۆر سوپاس، خواحافیز.
- سەلام لە عەبدولقادر بکە.
گەیمە بەر دەرگای ژوورەکەی. گوتی: بۆ کەس ئەم نەقڵە مەگێڕەوە.
لە برادەرەکەی شامیم پرسی مەسەلە چییە؟
- کاکە ئەوە کوردە؛ ئامۆزای منە. کەس نازانێ عەرەب نییە. ئیدارەی ئەمن ئەو هەڵیدەسووڕێنێ!
بە کوودەتای قاسم زۆر شاد بووین. ڕادیۆ بەغدامان دەکردەوە و گوێ بگرە و بەه بەهـ بڵێ! شەوێک قاسم نوتقی دەکرد. گوتم: زەبیحی خۆمانەین، ئەگەر بوێرم دەڵێم ئەو کابرایە دەلووکارە، نیوە شێتە.
زەبیحی لێم دەرهەڵ بوو:
- مەلا قسەی قۆڕ مەکە! کوا پیاوی وا گەورە و زانا؟
- گاڵتەم کرد، بمبخشە!
زەبیحی خۆی تێک نا لە شامەوە بڕواتەوە. منیش هاتمەوە ماڵ، شڕە و بڕەمان پێچایەوە کە بڕۆین. ڕەمۆی شیووعیم لێ پەیدا بوو:
- سەیدا! بە هیچ بارێکدا ڕازی نین تۆ بەجێمان بێڵی. تۆ زۆر بۆ ئێمە بە فایدەی!
- کاکە هەر بۆیە دەڕۆمەوە تا بزانن من جاسووسی نووری سەعید نەبووم...