ئەو پەرچەمە چین چینە لەسەر کوڵمی حەلاوە
از کتاب:
دیوانی ویساڵی
اثر:
وصالی (1902-1973)
2 دقیقه
588 مشاهده
ئەو پەرچەمە چین چینە لەسەر کوڵمی حەلاوە
مانەندی گوڵی سونبولە تێراوی شەواوە
باعیس بە هەناسەی منی مەحزوونە سبەینان
زوڵفی وەکوو ڕەیحانە لە هەر لاوە بڵاوە
شوعلەی شەمی ڕوخساری وەکوو ڕۆژی سەمایە
بۆنی نەفەسی زاری میسلی عەتری گوڵاوە
بۆ چی نەگری بولبولی بێچارە لە گوڵزار
چون عەتری گوڵی ڕۆیی بە دەم بادی سەباوە
مورغی سەحەری حەقیە ئەکا ناڵە و هاوار
مایەی هەموو سووتاوە، هەموو ماڵی بڕاوە
خەڵقینە مەدەن تانە لە ناڵینی دڵی من
ئەم حوزن و غەمە بوو بە بەشی من لە خوداوە
وەک کوورەیی حەددادە دەروونم بە گڕی عەشق
بەو ئاگرە برژاوە، دڵم گۆشتی کوڵاوە
داوێنی کەوا ئاڵە، مەڵێ خامەکی سوورە
گشتی دەمی عوشاقە بە داوێنی ڕژاوە
باعیس بە غەمی یووسفی دڵدارە عەزیزم
پشتم وەکوو چەوگانە کە پیرانە چەماوە
چ بکەم، چ بڵێم، تیری ڕەقیب جەرگی بڕیوم
مەعلوومە بە ئەو تیرە ئەچم، کارم کراوە
ئەی یار ڕەقیب دەرکە لەبەر ئەو دەرە پاکە
وەڵلاهی لە سەگ پیسترە، گشت گیانی گڵاوە
وەک دێوی لەعین بۆتە عەدووی زومرەیی عوشاق
لێێ لادە، دەبا لا بێ، هەزار مەکری بە دواوە
ئەو سڕڕە کە مەخفی بووە لە بەینی من و یارا
سەیری کە ئەوێستا کە لە نێو عالەما بوە
ئەو مەیل و مولاقاتە، لە پێشا هەبوو ڕۆیی
ئەو ئایین و ئادابە هەر ئاساری نەماوە
عاشق ئەبێ مل کەچ بێ لەلا حەزرەتی مەحبووب
ماندەندی ویساڵیتخلص کە ملی ناوە بەلاوە