سەرم ئێشێ لەبەر بێ چایی قوربان
از کتاب:
دیوانی ویساڵی
اثر:
وصالی (1902-1973)
2 دقیقه
703 مشاهده
سەرم ئێشێ لەبەر بێ چایی قوربان
وەکوو تەڕڕاح ئەوا کەوتووم لە مەیدان
کە چایە نووری چاوی ئینس و جیننە
کە چایە زینەتی بوستانی ڕیزوان
کە چایە شەمعی جەمعی عاشقانە
کە چایە شاهیدی گوڵزاری کەنعان
کە چایە موتریبی خۆشخوانی مەنزڵ
کە چایە ساقی بەزمی جوملە یاران
کە چایە خۆشەویستی جوان و پیرە
کە چایە دڵبەری سوڵتان و شاهان
کە چایە باعیسی ئەحیایی عالەم
کە چایە ڕەونەقی دێهات و شاران
کە چایە دافیعی عیجزی دەروونی
کە چایە واسیتەی ڕێکی و عیرفان
کە چا ئەسبابی بەزمی ئیتتیحادە
ئەگەر چایی نەبێ عالەم پەرێشان
خوسووس بۆ ئێستە گەر فەسڵی بەهارە
زەمانی عەیش و نۆش و بەزم و سەیران
ئەگەر چی ئێستە دونیا سەوز و سوورە
وەلی بێ چا سەراسەر چۆڵە قوربان
کە من چاییم نەبوو قوربان لە ماڵا
ئیتر بۆ چیمە ماڵی ورت و وێران
چ موحتاجی بەیاناتە کە بیکەم
ئەزانی حاڵی بێ چایی بە ویجدان
مەگەر چایە مەسیحی ئیبنی مەریەم
ئەکا ئەحیا هەزاران قەلبی بێجان
کە تەشریفی نەبوو چایی لە ماڵا
وەکوو ورچ بۆڵەیانە ماڵ و میوان
ویساڵیتخلص وێڵی وەسڵی بووکی چایە
وەکوو مەجنوون کەوا کەوتۆتە کێوان
کە ماڵێ خاڵی بوو یەعنی لە چایی
نییە فەرقی لەگەڵ ئەشکەوتی کێوان