پەیامی ون بوو

ژیان: هێشتا کرچ و کاڵ بوو
زمانی ئەیگرت و لاڵ بوو.
گەردوون: تەمەنی مناڵ بوو.
خۆر: تازە چاوی ئەپشکووت.
مرۆڤ: تازە بیری ئەبزووت
پێغەمبەرانی خوا ناردوو
ژمارەیان ئێجگار کەم بوو.
ئاسمان و ئەستێرە و دەریا
چیا و درەخت و گژوگیا
تازە ئەبوون و ئەخوڵقان
بە سروشتەوە ئەلکان.
زەمین هێشتا
هاڵاو لە لەشی هەڵئەستا!
کە - ئاوێستا -
لە ئاسۆی بیری زەردەشتا
بۆ کورد هەڵهات.
کە پەیامی ئاهورامزدا
لە لووتکەوە بانگی هەڵدا
بۆ گشت دنیا
بوو بە ئاوات!.تا کورد خاوەن ئاوێستا بوو
خۆریشی لەژێر دەستا بوو.
هەتاکوو چرای ئاوێستا
دائەگیرسا
بەرچاوی بیرمان ڕووناک بوو
سەرچاوەی دەروونمان پاک بوو
بەڵام کە ئاوێستا، برا،
دزرا و گۆڕدرا
بە نینۆکی ڕق و کینە
وشەی پیرۆزی لێ ڕنرا
مۆری بێگانەی پیانرا
ڕووناکیمان کەوتە کزیی
بەربووینەوە بەرەو نزمی
کە لە دەستمان چوو ئاوێستا
دەم و دڵ و بیرمان بەسترا
لەوساکەوە هەتا ئێستا!.