هاتوچۆ

لە کلۆری دارێکەوە
سەرنجم ناردە ژوورەوە
وەختێ سەرنجم هاتەوە
ئەویش وەک دار پیر پیر بووبوو
لە شەبەقی زامێکەوە
سەرنجم ناردە ژوورەوە
وەختێ سەرنجم هاتەوە
دەنکە گێلاسی گرتبوو
لە کەلێنی هەورێکەوە
سەرنجم ناردە ژوورەوە
وەختێ تەماشام هاتەوە
ڕەهێڵە و ڕێژنەی پێ بوو
لە درزی ساماڵێکەوە
سەرنجم ناردە ژوورەوە
وەختێ چاوانم هاتنەوە
هەزار پەپوولەی باڵ شینی
عەشقیان پێ بوو
لە کونەبای خەونێکەوە
سەرنجم ناردە ژوورەوە
وەختێ سەرنجم هاتەوە
سروەی مۆر و
تەمی سەوز و
نامەیەکی تەڕی پێ بوو!