ذکر توجه حضرت ختمی پناه از غار ثور به مدینه‌ی منوره و بیان وقایع که در آن راه تمام سخت و ناهموار روی نمودە و رسیدن سراقه نزیک حضرت ﷺ
از کتاب:
روضة الصفا
اثر:
میرزا عبدالقادر پاوه‌ای (1850-1910)
16 دقیقه
198 مشاهده
جە سوبح سێهەم عەبدوڵڵا و عامر
بەردن وە پای غار ئەو هەر دوو ئوشتر
وە تەوفیق حەق زات بێ زەواڵ
وشتران چۆک دان وە بێ قیل و قاڵ
شای خەتمی پەنا و سددیق سەروەر
وە سەبرێ جە غار سەور ئامان وە بەر
رەسوول ئێبتێدا «بسم اللهعربی»ی کەرد
سوار بی وە پشت ناقەی ڕەهنەوەرد
سددیق ئەکبەر هەم جە شۆن ئەو
سوار بی دەرلاد وە دەوان دەو
عەبدوڵڵا و عامر بەو ئێتێفاقە
هەر دوو شین وە بان پشت یەک ناقە
هەی کەردن ناقەی شیرین ئەندازە
هەر کامێ پەی وێش مەکەرد جانبازە
نەکەردن مودار بە وەخت و بی وەخت
ڕای چۆڵ سارا تەی کەردن وە جەخت
ڕوو کەردن وە ڕووی مەدینەی ئاوا
تا خوەرشید وە حەد نیمەڕۆ یاوا
یاوان وە جای یەک سەنگەڵاخ سەنگ
پیا بین دەرلاد وە بێ سەڎا و دەنگ
سددیق ئەکبەر وە بێ درەنگێ
جایێ تەرتیب دا جە سایەی سەنگێ
حەزرەت تەشریفش فەوری بەو جا بەرد
جە خەستەگی ڕا عەزم خاوش کەرد
بووبەکر دیا بەو دەشت و دەردا
دیش ها گەللەیێ ئاما جە سەردا
واتش بە چووپان ئەر هەن بەعزێ شیر
باوەر پەرێمان لێم نەبی دڵگیر
چووپان یەک قەدەح شیر پەرێش ئاوەرد
سددیق ئەکبەر خانە ئاباد کەرد
حەزرەت جەو دەمدا بێدار بی جە خاو
دەروون پاکش مەگڕیا پەی ئاو
تا ئەبابەکر شای سێدق و یەقین
شیر بەرد وە خدمەت «فخر العالمينعربی»
دەست موبارەک پەرێ قەدەح بەرد
نام خوڎا بەرد شیر تەناول کەرد
ئەبابەکر هەم بەعزێ جەو وەردش
شوکر زات پاک بێ زەواڵ کەردش
عەرز کەرد یا ڕەسوول دێرەن ڕا دوورەن
جای مەدار نیەن تەعجیل زەروورەن
دیسان حەزرەت و سددیق ئەکبەر
سوار بین وە پشت ناقەی کۆ پەیکەر
عەبدوڵڵا و عامر هەر دوو بین سوار
ڕاهی بین وە شۆن موستەفای موختار
وشتران هەر دوو چوون تەیر نیشت نە باڵ
ڕاهان تەی کەردن وێنەی بای شەماڵ
جەو تەرەف قورەیش ئەعیان و ئەشراف
حوکم کەردشان وە هەر چوار ئەتراف
عەرەب عەشایر گرۆی سەد وێنە
مەخلۆق مابەین مەککە و مەدینە
هەر کەس موحەممەد چەنی ڕەفێقش
بووبەکر سەروەر یانێ سدیقش
هەر چی سەحابە شیەن چەنی ئەو
قەتڵشان بکەن وە دەوان دەو
هەر یەک سەد وشتر خەڵات بەهاشەن
پێش مەڎان هەرچی ئەو تەمەنناشەن
تا کە ئی خەبەر جەو زێد و ماوا
وە لای سوراقەی بن مالک یاوا
بەڵام سوراقە مەردێ ناخار بێ
دایم موبارز هەزار سوار بێ
شەخسێ وات ئارۆ من جە ڕاگوزەر
مەکەردم نگا سارا و دەشت و دەر
چەند نەفەر وەی ڕەنگ وە تاو و تەعجیل
مەشین وە ڕاوە وە بێ قاڵ و قیل
جە ڕاگەی سارا چەند کەس وێنەی باد
ویەردن بە شاد وە خاتر گوشاد
بەو تەور ناقەشان هەر دوو بە دوو بین
هەر موحەممەد و یاران ئەو بین
سوراقە واتش تۆ خاوت بەردەن
ئەوان بەو ڕا دا گوزەر نەکەردەن
پەی ئێڎ ئەگەر ڕۆ وەگەر هەم شەو بۆ
فەتح ئەو کارە وە دەست ئەو بۆ
ئەوش فەریب دا وێش هەم شی وە ماڵ
پەخش کەرد وە سەر دا لۆی چەتفە و حەکاڵ
زرەی داوودی وە تەن بەستەوە
نەیزەی دڵ پەیکەر گێرت بە دەستەوە
ڕەخت ڕۆی مەساف یەکسەر کەرد نە وەر
سەلاحش پۆشا جە پا تا وە سەر
فەرما تا ئەسپش زین کەردن وە جەخت
سوار بی دەرلاد دێو ناشەنەخت
ڕوو کەرد نە سەحرا بەور بێ نەزیر
ئەسپش جە عەرەق سیا بی چوون قیر
یاوا وە جایێ چوون عەلەم داران
دیار دا حەزرەت ماباقی یاران
بەڵێ یەک قانوون قەدیم ڕۆزگار
هەر مەندە بێ پەی ئەوان بە یادگار
سێ دانە خەدەنگ چۆی تیر ماوەردن
پەرێ تەفەئئول مەرقووم مەکەردن
«أمرني ربیعربی» وە چۆی ئەوەڵ تیر
«نهانی ربیعربی» دوهەم چوون خەمیر
سێ هەم بی مەرقووم چوون لەوح سادە
هیچ نمەنویشتن کەم یا زیادە
مەوەستن وە تۆی تای جبەی تەرکەش
پەی ئەهل نیاز وە بێ غەل و غەش
هەر کەس نیازش مەبی نە دەروون
دەس مەبەرد تیرێ ماوەرد وە بیروون
ئەر خەدەنگ «أمرعربی» ماما وە دەستش
دەردەم پەی مەقسوود کەمەر مەبەستش
ئەر نەهی ماما جە تەرکەش وە بەر
سەودای ئەو مەتڵەب بەر مەکەرد جە سەر
ئەر تیر بێ خەت بوینا وە چەم
تەفەئئول مەکەرد جە نۆ دیسان هەم
سوراقە جەو دەم چوون باد باران
یاوا وە نەزدیک موستەفا و یاران
ناگا جە تەقدیر «رب العالمينعربی»
ئەسپش تەکان دا کەوت وە ڕووی زەمین
دەس بەرد وە تەرکەش تیرێ بەر ئاوەرد
تەماشای تەحریر خەت خەدەنگ کەرد
واتش ئەر ئارۆ وە بێ چەند و چوون
موحەممەد وە دەست من مەبۆ نگوون
دیش نەهی ئاما تەقدیر وە تاڵەش
عاقڵ جە هەیبەت مەتۆقۆ زاڵەش
ئێعتێبار نەکەرد دیسان بی سوار
هەم نیا وە شۆن ڕەسوول نازار
سوراقە ئەوند نەزدیک بی پێشان
سەڎای قەرائەت مەشنەوا لێشان
سددیق ئەکبەر دەم وە دوعاوە
گا مەڎیا بە وەر گا بە دماوە
ناگا هەر دوو دەست ئەسپ ئەو بەدڕوو
شی وە خاکدا تا عوقدەی زانوو
سوراقە دەر دەم وە بێ مودارا
تلیا وە زەمین چوون کووە خارا
جەو دما خەیلێ زەجر ئەسپش کەرد
تاکە دەست و پاش جە خاک بەر ئاوەرد
دیسان سوراقە سوار بی وە زین
نە شۆن حەزرەت «فخر المرسلينعربی»
رکاب دا وە ئەسپ توند تەکاوەر
جەنگجووی ڕۆی مەساف مەرد ناموەر
یەک دوو نەیزە مەند بیاوۆ پێشان
هەر چوار ئەرواح بستانۆ جێشان
حەزرەت پەنا بەرد وە زات باری
سددیق ئەکبەر دەست کەرد وە زاری
عەرز کەرد یا ڕەسوول قۆمیا لێمان
سوراقەی بەڎبەخت ها یاوا پێمان
فەرما تۆ زاریت سەبەب جە چێشەن
سەڎای گریەی تۆ دڵ تەنگی پێشەن
عەرز کەرد من پەی وێم ئەندووهم جە کۆن
گریە و زاری من پەی وجوود تۆن
سوراقە جە نۆ هەم تەفەئئول کەرد
وە عەزم نیاز تیرێ بەرئاوەرد
دیسان هەم نەهی بەرئاوەرد وە بەر
مەکرووە بێ وە تەبع گومڕای بەڎنەزەر
عەنان کەرد سەبوک تەکان دا فەرەس
وە عەزم قێتال مەرد بوولهەوەس
حەزرەت نگا کەرد سوراقە یاوا
نیازش قەتڵەن خەیاڵش داوا
واتش یا کەریم فەرد تەنیای تاک
سوراقەی بەڎبەخت مەحبووس کەر نە خاک
ناگا سوراقە جەو فێتراکەڎا
ئەسپش تا ڕکاب شی وە خاکەڎا
بە دوعای حەزرەت «ختم المرسلينعربی»
وێش وە فەوق فەرق کەوت وە ڕووی زەمین
سوراقە ماتەڵ مەند وە بێ نوسرەت
هانا کەرد هاناش یاوا وە حەزرەت
وات یا موحەممەد یە دوعای تۆ بی
تەئسیر ئەنفاس سەحەرگای تۆ بی
شەرمەندە و خجڵ نادان و وەحشم
بویەر جە تەقسیر بڎەر نۆبەخشم
هەر کەس جە عەقەب تاڵب وە تۆ بۆ
ئەر شێر غەڕڕان یا دێو کۆ بۆ
یەقین مەبەرووش چەنی وێم وە پەس
هەنی کەس بە تۆ نمەبۆ دەس ڕەس
تیر جبەی من ببەر چەنی وێت
هەر چیت لازمەن چووپان مەڎۆ پێت
فەرما من موحتاج نیم وە ماڵ کەس
پێم وەسەن کەرەم فەرد فەریاد ڕەس
غەرەز، سوراقە فراوان لاڵا
تۆز پای ناقەش وە دیڎە ماڵا
دیسان حەزرەت وات یا دانای داوەر
ئەگەر سادقەن نەجاتش بڎەر
دوعاش قەبووڵ کەرد پادشای بێ باک
ئەسپ سوراقە بەر ئاما جە خاک
سوراقە عەرز کەرد سەخت نەیۆ لێتان
زاد مەتاعم بووەن پەی وێتان
حەزرەت هەنی هیچ قەبووڵ نەکەرد لێش
فەرما من زاد و مەتاعم پەی چێش؟
ئەر کەسێ ئاما جە بەد ئەندێشان
واقێعەی ئێمە مەواچە پێشان
سوراقە عەرز کەرد یەک ئامان نامە
مەبۆ کەرەم کەی تۆ وەی غوڵامە
حەزرەت ئەمرش کەرد عامر بێ ئەندێش
مەرقووم کەرد جە پۆس پارە دا وە پێش
سوراقە دەر دەم هێممەت خواهی کەرد
وە سەد شادی و زەوق ڕوو وە پەس ئاوەرد
غەرەز، وە ڕاوە وە هەر کەس یاوا
گێڵناش وە پەس بێ جەنگ و داوا
واتش من چەند ڕۆ زەحمەتم بەردەن
موحەممەد وەی ڕا گوزەر نەکەردەن
نە موحەممەد وێش نە ئەسحاب ئەو
نامان نەویەردەن نە وە ڕۆ نە شەو
داوازان داو یەکسەر نادم کەرد
شی وە دماوە گشت چەنی وێش بەرد
بەڵێ نە جەدان ئەوەڵ هێدایەت
وەی تەور مەرقوومەن ئەسڵ ڕێوایەت
جە دمای غەزای حونەین مەشهوور
سوراقە تەی کەرد مەنزڵان دوور
یاوا وە پا بۆس شای «خير البشرعربی»
ئەو ئامان نامەش دا بە پێغەمبەر
دین ئێسلامش ئەو ڕۆ کەرد قەبووڵ
ئیمانش ئاوەرد بە خوڎا و ڕەسووڵ
جە کۆ بشنەوین شای بوڕاق سوار
چەنی ئەو یاران شەرت و وەفادار
جە هیچ مەکانێ نەگێرتن ئارام
جە شام تا سەحەر، سەحەر تا وە شام
دیشان خەیمەیێ دیارەن جە دوور
درەخشان تەرەن جە شەمع کافوور
خەیمەی «عاتكة بنت خالدعربی» بێ
وە قەوم ئەو زێد، یەکسەر والێد بێ
خەیلێ سەخا و تەبع شیرین ڕەفتار بێ
عەفیفەی دەوران ڕووی ڕۆزگار بێ
وە ئومم موعید مەبەردن نامش
عاڵەم مەنۆشا شەربەت نە جامش
سالار ئەو هۆز گشت نیک و بەد بێ
زاهێرەن زەوجەی ئەبوو موعید بێ
حەزرەت جەو خەیمە پا ئاوەردەوە
خەرگا و خەیمە گشت ئاوا کەردەوە
تەبەق تەبەق نوور جە سەردا مەوەشت
خەیمە پەڕ نوور بی چوون خەیمەی بەهەشت
یاران حەزرەت وە ناتەوانا
جە گوروسنەگی کەردشان هانا
واتشان نانێ یا خورمایێ تەڕ
بفرۆشە پێمان بسانین وە زەڕ
ئومم موعید ڕوو کەردش وە یاران
واتش چوون باران ئێمساڵ نەواران
چوونکە قەحتییەن ئەرزاق نەدارین
وێمان وە عوسرەت ئەوقات مەویارین
ئەر تەعام مەبی مننەت مەبەردم
بە خوڎا زیافەت ئێوە مەکەردم
هەنی بە خەرید بە فرۆش نەبێ
موحتاج بە ئێزهار واتەی تۆش نەبێ
خواجەی کائێنات دیش پیرە مێشێ
لەنگ و لاغر و سیاسەت کێشێ
جە گۆشەی خەیمە پەژارەش بەردەن
چوون گوناهکاران تەناف نە گەردەن
پەرسا کە ئەویش بەو تەور ئەسیرەن
داخۆ شیردارەن یا خۆ بێ شیرەن؟
ئومم موعید وات کە ئەو گووسفەندە
ئەو لەنگ لاغر، گەللە وامەندە
ها وەختەن ئەرواش بەر بشۆ وە بەر
جە کۆ شیر دارۆ هەی خاکش وە سەر
حەزرەت فەرماوا ڕوخسەت بدەر پێم
بشوون بدۆشووش من بە دەست وێم
واتش ڕوخسەتەن بەڵام نەدارۆ
سێ ساڵەن نەبیەن چۆن مەبۆ ئارۆ
حەزرەت تەشریفش بەرد وە لای گووسفەند
ئێسم پاک زات شای بێ زەواڵ وەند
دەست موبارەک شەریف وێش بەرد
نەرمێ ئێشارەی پستان مێش کەرد
وە مەیلان حەق یەکتای بێ نەزیر
دەمارش یەکسەر گشت پەڕ بی جە شیر
بەو تەور سەنگین بی جە شیر پستانش
جای موورێ نەمەند جە بەین ڕانش
وە ئیزن مەعبوود تاک تەنیای فەرد
جە ساحێب خەیمە زەرفێ تەڵەب کەرد
یەک قەدەح بزورگ ئاوەردن پەرێش
دۆشا ئەو گووسفەند وێش بە دەست وێش
لەبا لەب قەدەح لەب ڕێز بی جە شیر
جەو شیر بۆ خۆش ئاڵای بۆ عەبیر
پەی ئومم موعید کیاناش دەرلاد
فەرما بنۆشۆ حەق کەردەن زیاد
باز هەر ئەو قەدەح وە ئەسحابان وەرد
نۆشاشان تەمام یەکا یەک سێر کەرد
جە دمای گشتین وێش هەم بەعزێ وەرد
چوون چەشمەی سەراو هەر زیاد مەکەرد
هەر چی زرووفات خەیمەی ئەو ماڵ بی
یەکسەر پەڕ جە شیر نوقرەی دووقاڵ بی
تەشریف خەیرش وە دڵ خواهی دڵ
سوار بین جە نۆ بەرشین جەو مەنزڵ
روو کەردن وە چۆڵ وە بیابانە ڎا
وە بەڕ و بەیدی عەرەبسانە ڎا
جە دمای حەزرەت نە چەراگاوە
شووی ئومم موعید ئاما جە لاوە
دیش گۆشەی مەنزڵ خەیمە بۆ عەبیر
زرووفات تەمام لەب ڕێزەن جە شیر
واتش ئی شیرە گشت کێ ئاوەردەن؟
چ تەور جەم بیەن کێ پەیداش کەردەن؟
ئومم موعید وات شەخسێ موبارەک
سەر تا قەدەم نوور شیرین تەدارەک
ساتێ بی مێهمان نیشت بە وێنەی خوێش
جەو دما دیا پەی ئەو پیرە مێش
ئی شیرە یەکسەر وە دەوان دەو
حاسڵ کەرد یەک سات جە پستان ئەو
ئەبووموعید وات هیچ پەنهان مەدەر
شەممەی جە وەسفش پەی من بەیان کەر
جواب دا شەخسێ خۆش فام خۆش خۆ
گوڵ ڕەنگ گوڵ قامەت گوڵ بەدەن گوڵ بۆ
دیدە وە سورمەی لوتف حەق ڕەشتە
نوور ئێلاهی وە سەردا وەشتە
نوکتە دان سڕ واقێعات غەیب
مەلایک تەرکیب بەری جە گشت عەیب
ئێبراهیم سوورەت ئەعلا موقەددەس
موسا موعجێزە عیسایی نەفەس
خوەلاسە ئەوساف پاک پێغەمبەر
یەکا یەک تەمام عەرز کەرد وە شەوهەر
بەو تەورە بزورگ پەڕ نووش و عەیشەن
ئەگەر هەن ساحێب قەوم قورەیشەن
سەنادید جە ئەو دایم داغدارەن
ڕوئەسا پەرێش گشت تەڵەب کارەن
ئاخ من بیاوام وە حزوور ئەو
پەی پەی ببۆسام قوببەی نوور ئەو
جە قاپی گەردوون ئێڎم هەن نیاز
بە دین پاکش ببوون سەرئەفراز
ئومم موعید وات جەی خەیمە ئاوا
ئەو مێشە کە دەست حەزرەت پێش یاوا
یە هەژدە ساڵەن مودام سوبح و شام
شیر مەڎۆ دایم چوون ئاینە جام
ئەسڵەن جەو شیرە زەڕێ نەکەرد کەم
مەند تا خەلافەت فارووق ئەعزەم
جە دمای هێجرەت شای «خير الأنامعربی»
قورەیش یەکسەر شین وە «بيت الحرامعربی»
واتشان هەر کەس مەرد پەڕ هونەر
فەرق موستەفا و سددیق ئەکبەر
باوەرۆ پەی قەوم بە شادی و تەرەب
ئەشراف قورەیش ڕوئەسای عەرەب
هەر یەک وشترێ گشت جە یانەی وێش
گەنج و جەواهێر هەم مەبەخشان پێش
ناگا «بریدە بن خضیب» نامێ
مەرد ساحێب زۆر شێر پەڕ سامێ
سەر قەبیلەی قەوم چەند عەشایێر بێ
نامش جە مەجلێس مەردان دایێر بێ
زاهێر بی تەماع چەنی هەفتاد کەس
یەکسەر نەوجەوان تەمامی نەوڕەس
دەردەم سوار بین پا دان نە ڕکاب
ڕاهی بین چوون بەرق برێقەی شەهاب
رای چۆڵ سەحرا گێرتشان نە وەر
دین دیارەن شۆن ناقەی پێغەمبەر
سێ شەوان و ڕۆ هەی کەردن وە جەخت
نەگێرتن ئارام بە وەخت و بێ وەخت
پەی ڕۆی چەهاروم هەر وە قەترە و دەو
یاوان وە حەزرەت وە ئەسحاب ئەو
بەریدە حەزرەت ئەو ڕۆ نەشناسا
بە وێنەی سەرسام ساتێ تەواسا
تا حەزرەت پەرسا فەرما تۆ کێنی
شێخ عەشایێر کام سەرزەمینی
عەرز کەرد «بریدە بن خضیب»م
ئەشراف قورەیش داشان فەریبم
قەستم پەی قەتڵ موحەممەد کەردەن
یەقین چەند شەوم وە ڕۆ ئاوەردەن
ئیسە ناپەیدان نەڎارۆ ئەسەر
نمەز جە کام ڕا کەردەنش گوزەر
حەزرەت حاڵی بی جە ئەحواڵ ئەو
دڵ وەش کەرد جە نام فەڕوخ فاڵ ئەو
روو کەرد وە سددیق فەرما ئەی ڕەفیق
وە «حسب الخواعربی»ی تۆن کاران وە تەحقیق
حەق ئاوا کەرۆ ئی زێد و ماوا
ئوموور ئێمە بە ئەنجام یاوا
باز جە بەریدە هەم پەرسا خەبەر
جە کام قەبیلەی مەرد دلاوەر
وات ئومم سەلمەن نام قەبیلەم
بە خوڎا من دڵ ساف بێ مەکر و حیلەم
حەزرەت سەلەمهاش ئێزهار کەرد بە دڵ
واتش بە سڵامەت مەشین وە مەنزڵ
باز حەزرەت پەرسا جە کام قەومەنی
حەیف تۆ بێ سەلات هەم بێ سەومەنی
واتش من جە تۆ پەیدا بی وەهمم
جە ئەسڵ و نەسەب جە بەنی سەهمم
فەرما سەهمی تۆ گشت بەرشی وە بەر
هەنی نەمەندەن جای کینە و کەدەر
بەریدە جە سام سەنگین حەزرەت
جە لەفز گوفتار شیرین حەزرەت
خەیلێ حەیران مەند واتش یە کێ بۆ
وەی تەور خۆش کەلام خۆش ڕەنگ و خۆش بۆ
عەرز کەرد تۆ کێنی ئەی بزورگەوار
نام تۆ چێشەن جە ڕووی ڕۆزگار
حەزرەت فەرماوا من عەبد ئەڵڵام
موحەممەد ڕەسوول ئێبن عەبدوڵڵام
فەراری قورەیش قەوم پەڕ کینەم
ئیسە ها عازم موڵک مەدینەم
بەریدە دەرسات ئیمانش ئاوەرد
ئێقرار بە خوڎا و بە پێغەمبەر کەرد
دین ئێسلامش قەبووڵ کەرد بە دڵ
بە ئایەی قورئان تەسدیق کەرد حاسڵ
باقی یارانش ئەو هەفتاد نەفەر
ئیمان ئاوەردن گشت بە پێغەمبەر
ئێقرار بە خوڎای واحێد کەردشان
سوجدەی زات پاک واحێد بەردشان
یاران حەزرەت ئەو شەو وە شادی
ویاران وە زەوق بەزم ئازادی
بووبەکر سددیق سەحابەی سەروەر
کەردن شوکر زات دەهندەی داوەر
سەحەر وە تەوفیق بێ هەمتای وەهاب
خوەرشید بەر ئاما جە پەردەی نەقاب
بەریدە عەرز کەرد «يا خير الأنامعربی»
یەک عەرزێ داروون وە سەرگەردت بام
هەنی بەی وەسواس جەی سەرزەمینە
تەشریف خەیرت مەبەر مەدینە
تا دەستار وێش شێونا جە سەر
کەردش وە بەیداخ پەرێ پێغەمبەر
وێش هۆرگێرت عەلەم ئەژدەها پەیکەر
سەڵەوات دا وە ڕووی پاک پێغەمبەر
ڕاگەی مەدینە گێرتشان نە وەر
بوڵەند بی سەڎای «الله اكبرعربی»
کەش و کۆ و کەمەر سارا و پەس و کاو
سەنگ و دار و خار خاک و باد و ئاو
هەر کامێ پەی وێش وە «لبيك لبيكعربی»
مەوات «يا رسول سلام عليكعربی»
حەزرەت تەوازوع مەکەرد چەنیشان
وەعدەی شەفاعەت وێش مەڎا پێشان
جەو دما ڕوو کەرد وە لای بەریدە
فەرما ئەی عەزیز کار پەسەندیدە
تۆ جە دمای من مەبی هەراسان
مەشی وە شارێ ها جە خوراسان
شارێ عەجەب ڕەنگ تەمام ئابادەن
«أخي ذو القرنينعربی» بیناش نەهادەن
نام و نیشانش ئەر پەرسی کامەن
مەعلووم بۆ وە تۆ هەر مەروش نامەن
تۆ مەبی وە نوور ئەهل مەشرێق گشت
وێران مەکەی تەرح کلیسا و کنشت
فایز پەی ئەوان بێ خۆف و خەتەر
یەقین تۆ مەبی جە «يوم المحشرعربی»
بەڵێ دمای چەند مەعرەکە و داوا
فەرموودەی حەزرەت وە ئەنجام یاوا
باقی داستان و حێکایەت دوورەن
مەتڵەب موختەسەر کۆتا زەروورەن
ئاخر جەو دەمدا بە ئەمر ئەڵڵا
جە ڕا دا تەلحە ئێبن عەبدوڵڵا
جە توجار شام دەعوەت کەردە بێ
چەند دەوڵەت چەنی وێش ئاوەردە بێ
یاوا وە حزوور شای «خير الأنامعربی»
فەورەن داخڵ بی وە دین ئێسلام
وات یا موحەممەد ڕۆحم فێدات بۆ
سەر و ماڵم گشت سەرگەرد ڕات بۆ
من هەم جە ڕکاب شای گەردوون ئەفسەر
عازمم تا موڵک مەدینەی ئەنوەر
حەزرەت فەرما تۆ جە مەککەن ماڵت
هەم بشۆ وە لای بەچە و عەیاڵت
تا کە ئەو موشرێک عەدووی بێ وێنە
نەزانان تۆ هەم، بۆ پەی مەدینە
مەبۆ ئارامت سوبح و شام نەبۆ
تا کە هێجرەتت ناتەمام نەبۆ
خواجەی کائێنات، سددیق ئەکبەر
جامەی نۆ سفید پۆشاشان نە وەر
بەریدە کێشا بەیداخ شاهی
مەلایک جەم بین جە ماهـ تا ماهی
حەزرەت وەی سەحاب سپای ڕەنگینە
ڕوو نیا وە ڕووی موڵک مەدینە
دووشەنبە غەڕەی «ربيع الأولعربی»
واقێع بی هێجرەت بێ سەهو و خەلەل