باز آوردن خسرو شاپور را در نزد شیرین و بی طاقت شدن شیرین جهت شاپور
از کتاب:
شیرین و خوسرەو
اثر:
خانای قبادی (1704-1778)
4 دقیقه
216 مشاهده
خامەی خۆش نەققاش ئەی نەقش دێرین
بەی تەور شیرین کەرد بە ڕاز شیرین
چون خوسرەو جە کار شیرین ئەرمەن
بار بی بە جەستەش کۆی خەم بە خەرمەن
زاناش خەم پەرداز ئەو شۆخ شاپووڕەن
بە شاپوور مودام خەیلێ زەروورەن
حوکم هومایوون ڕەوان کەرد بە جەخت
ئاوەردن شاپوور چینی وە پای تەخت
تا کە بە تەنیا شیرین دڵ ڕێش
بویارۆ بە تاڵ ڕۆزگار وێش
وەختێ کە دوور کەفت شیرین جە شاپوور
قرچەش کەفت نە جەرگ بوریانی دەستوور
پەی تەنیایی وێش خاترش بی تەنگ
ڕێزا جە نەرگس ئەسر لالە ڕەنگ
وەنەوشەی ئاهش نە غونچەی دەهان
بەرشی نە فەرقش چون شاخ ڕێحان
شەوێ تەمام شووم فراوان سەنگی
سیاتەر جە مار زەنندەی جەنگی
ئەو شەو مواتت چون عەرسەی قیام
پەنجا هەزار ساڵ توولش بی تەمام
تاریکیش چون گۆڕ جهوود بێ دین
گرتەبێ عەرسەی سەما و ڕووی زەمین
کەردەبێ لەب ڕێز جە مەهـ تا ماهی
وێنەی دەریای قیر مەوج سیاهی
نە عەسەس دیار، نە دەییار هیچ کەس
نە بانگ خورووس، نە ناڵەی جەرەس
موئەززین چمان مار پاش گەستەبێ
دەهۆڵ ژەن چمان دەستش بەستەبێ
فەڵەک کەفتەبێ چون قوتب نە سەیران
هەر نە جای وێشدا مەندەبێ حەیران
ئەو شەو ئەو شیرین شۆخ شیرین ڕەنگ
تا شەبەق شەق بی چەنی شەو کەرد جەنگ
مگرەوا و موات: بەد حاڵ ئیمشەو
بازار شادی بەتاڵم ئیمشەو
جە بار مەینەت دڵ خەستەم ئیمشەو
گەور کۆ نەبۆ بە جەستەم ئیمشەو
یە خۆ شەو نییەن، یە سیا مارەن
یا زەنگیی بێ ڕام ئادەمی خوارەن
یە چێش بی هەی چەرخ ڕا چەفت کەچ ڕاو
ڕۆ نەکەردیوە جە بەختم ئیمشەو
یە پەی چێش ئیمشەو ستارەی سەحەر
چمان مەحبووسەن نمەیۆ وەبەر
خۆر هەم جە بەختم نە پەنای پەردەن
ئەر هەن ئەویچ ڕای شەفەق گوم کەردەن
من خۆ گیانم بە تاقەت یاوا
غونچەیێ جە بەخت شووم نەشکاوا
کۆن ئەو تاڵە بەخت چرای سوبح دەم
ڕەوشەن بیایا ئیمشەو وێنەی شەم
پەی چێش؟ کا ئەکسەر جە زومرەی پیران
ماچان دوعای سوبح عاشقان گیران
تا کە ئێدش وات شیرین دڵبەر
ڕەوشەن بی سیماب سوب جە نوور خۆر
شیرین دیش وادەی سوب سەحەر خێزا
سەحراش سەمەنزار نە وەهار بێزا
جە دودی دەروون بێ حەد زاری کەرد
ئیلتیجا بە زات پاک ئێزەد بەرد
بە قاپیی بڵند «قاضي الحاجاتعربی»
بەی تەور بە ئیخڵاس کەردش موناجات
بە هەر هەفت ئەورەنگ ڕەنگین خۆش تەرز
بە هەر هەشت بەهەشت ئەعلای پایە بەرز
بە ڕوتبەی بزورگ گشت پەیغەممەران
بە سیڕۆ سینەی ساف سەروەران
بە زیکر تەسبیح شێخان کامڵ
بە ویرد و ئەوراد پیران قابڵ
ڕەحمێ کەر بە حاڵ پەشێویی جەستەم
فرێ سەرگەردان خەرگاو خەستەم
غەیر جە تۆ فێشتەر بە کەس نی یەرجووم
چون بەی تەور جە قەوم قەرداش وێم بووم
گۆشایندەی عەقد موشکوڵان سەخت!
گوشاد کەر عوقدەی موشکوڵم بە جەخت
یا قەدیم بە زات، قەییوم قایم
ئەر تۆ نەکەری موشکوڵ گوشاییم
مزانوو بە وێم نییەن حاسڵم
موشکوڵتەر مبۆ عوقدەی موشکوڵم
چون جە بێ عەقڵی، بینای «لاینام»
وە پای وێم چون مەل کەفتەنان نە دام
یا جەی دام سەخت بکەر ئازادم
یا بە کام دڵ بدەر مرادم
ئێد وات، سوجدەش بەرد بە دیدەی نمناک
چون مورغ بیسمیل غەڵتیا ن خاک
دەرسات پێش نەسیم لوتف حەق یاوا
غونچەی مرادش چون گوڵ شکاوا
جە عەتر شادی وەشبۆی عەبیرین
عەبیر ئامێز کەرد دەماخ شیرین
بە فەیز ئەڵتاف بینای باڵا دەست
ئاخر جەو تاڵی و ترشی شیرین ڕەست
مەتڵەبش نە دڵ خوسرەو کەرد ئەسەر
بنازوون بە فەیز دوعای سوب سەحەر!