baz awirdin xisru şapur ra dir nizd şîrîn û bî taqit şidin şîrîn cihit şapur
From the Book:
Şîrîn û Xusrew
By:
Khana Qubadi (1704-1778)
4 minutes
245 views
xamey xoş neqqaş ey neqiş dêrîn
bey tewr şîrîn kerd be řaz şîrîn
çun xusrew ce kar şîrîn ermen
bar bî be cesteş koy xem be xermen
zanaş xem perdaz ew şox şapûřen
be şapûr mudam xeylê zerûren
ḧukim humayûn řewan kerd be cext
awerdin şapûr çînî we pay text
ta ke be tenya şîrîn dił řêş
buyaro be tał řozgar wêş
wextê ke dûr kefit şîrîn ce şapûr
qirçeş kefit ne cerg buryanî destûr
pey tenyayî wêş xatirş bî teng
řêza ce nergis esir lale řeng
wenewşey ahiş ne ẍunçey dehan
berşî ne ferqiş çun şax řêḧan
şewê temam şûm firawan sengî
syater ce mar zennidey cengî
ew şew mwatit çun ’ersey qyam
penca hezar sał tûlş bî temam
tarîkîş çun goř cihûd bê dîn
girtebê ’ersey sema û řûy zemîn
kerdebê leb řêz ce meh ta mahî
wêney deryay qîr mewc syahî
ne ’eses dyar, ne deyyar hîç kes
ne bang xurûs, ne nałey ceres
mu’ezzîn çiman mar paş gestebê
dehoł jen çiman destiş bestebê
fełek keftebê çun qutib ne seyran
her ne cay wêşda mendebê ḧeyran
ew şew ew şîrîn şox şîrîn řeng
ta şebeq şeq bî çenî şew kerd ceng
migrewa û mwat: bed ḧał îmşew
bazar şadî betałim îmşew
ce bar meynet dił xestem îmşew
gewr ko nebo be cestem îmşew
ye xo şew nîyen, ye sya maren
ya zengîy bê řam ademî xwaren
ye çêş bî hey çerx řa çefit keç řaw
řo nekerdîwe ce bextim îmşew
ye pey çêş îmşew sitarey seḧer
çiman meḧbûsen nimeyo weber
xor hem ce bextim ne penay perden
er hen ewîç řay şefeq gum kerden
min xo gyanim be taqet yawa
ẍunçeyê ce bext şûm neşkawa
kon ew tałe bext çiray subiḧ dem
řewşen byaya îmşew wêney şem
pey çêş? ka ekser ce zumrey pîran
maçan du’ay subiḧ ’aşiqan gîran
ta ke êdiş wat şîrîn diłber
řewşen bî sîmab sub ce nûr xor
şîrîn dîş wadey sub seḧer xêza
seḧraş semenzar ne wehar bêza
ce dudî derûn bê ḧed zarî kerd
îltîca be zat pak êzed berd
be qapîy biłind «qazî alḧacatArabic»
bey tewr be îxłas kerdiş munacat
be her hefit ewreng řengîn xoş terz
be her heşt beheşt e’lay paye berz
be řutbey bizurg gişt peyẍemmeran
be sîřo sîney saf serweran
be zîkir tesbîḧ şêxan kamił
be wîrd û ewrad pîran qabił
řeḧmê ker be ḧał peşêwîy cestem
firê sergerdan xergaw xestem
ẍeyr ce to fêşter be kes nî yercûm
çun bey tewr ce qewm qerdaş wêm bûm
goşayndey ’eqid muşkułan sext!
guşad ker ’uqdey muşkułim be cext
ya qedîm be zat, qeyîwim qaym
er to nekerî muşkuł guşayîm
mizanû be wêm nîyen ḧasiłim
muşkułter mibo ’uqdey muşkułim
çun ce bê ’eqłî, bînay «laynam»
we pay wêm çun mel keftenan ne dam
ya cey dam sext biker azadim
ya be kam dił bider miradim
êd wat, sucdeş berd be dîdey nimnak
çun murẍ bîsmîl ẍełtya n xak
dersat pêş nesîm lutif ḧeq yawa
ẍunçey miradiş çun guł şikawa
ce ’etir şadî weşboy ’ebîrîn
’ebîr amêz kerd demax şîrîn
be feyz ełtaf bînay bała dest
axir cew tałî û tirşî şîrîn řest
metłebiş ne dił xusrew kerd eser
binazûn be feyz du’ay sub seḧer!