دوباره بی طاقت شدن خسرو جهت شیرین
از کتاب:
شیرین و خوسرەو
اثر:
خانای قبادی (1704-1778)
3 دقیقه
480 مشاهده
جەودما کە شا بە چەند دەرد سەر
جە ڕەغم شیرین ئاوەردش شەکەر
دیسان گڕەی عەشق شیرین لێش تاو دا
تاویا وێنەی شەکەر جە ئاودا
جەرگش تاڵ عەشق شەکەر ڕێزنا
پەی نوقڵ شیرین شەکەر بێزنا
جە دووریی شیرین مگڕیا چون شەم
چون ئەوزاع قەوس قامەتش بی خەم
بەڵێ سا عاشق بێچارەی مەزڵووم
جە گیان شیرین وێش ئەو بی مەحرووم
بڕێزیش نە دەم ئەر سەد جار شەکەر
سوودێ نەدارۆ بە دانای داوەر
بە کێش زومرەی عاشقان پێش
«خصوصاًعربی» خوسرەو پەی شیرین دڵ ڕێش
شەکەر نەگرتەن هەرگیز جای شیرین
شەکەر خاستەرەن یا حەڵوای شیرین؟
چەمەن کەی بێ گوڵ عەنبەرین مبۆ؟
شەکەر بێ تامەن ئەر شیرین نەبۆ
وەختێ مبۆ شەمع شیرین فرۆزان
نە مەجمەر چون عوود شەکەر مسۆزان
جە شەکەر جەو بۆن شیرینەن خاستەر
شیرین چون گیانەن، جای گیانەن شەکەر
غەرەز پەی شیرین دڵ چون نەی ناڵا
ئاما بە زوان جە خوسرەو لاڵا
وات: من گڕەی سەخت فرۆزانمەن
پەی شێوەی شیرین شاخ سۆزانمەن
سیوای شیرینیی شیرین دڵبەر
نمەیۆم بە کام سەد کەللەی شەکەر
خوسرەو وات: هەی دڵ دێوانەی سەرمەست
یە تەقسیر تۆن یانەت بۆ دەربەست!
من تا کەی بەی تاج، بەی تۆمارەوە
بەی تەخت شاهی، بەی سەر کارەوە
وێنەی فەرەنگیی بێ پیر و کافر
مکەریم ئەسیر شیرین و شەکەر
گا ماچی شیرین شەکەر مبێزۆ
گا ماچی گەرمەن تەب لێش مخێزۆ
گا ماچی شیرین شیفای من پێشەن
شیرینم کە هەن شەکەر پەی چێشەن
شیرینیی شیرین ئەر وەش مبۆ لێت
سا هۆرگێر جە شەهد شەکەر دەست وێت
وەرنە وەس دەرەم وەی تەور دەرد سەر
گاهێ پەی شیرین، گاهێ پەی شەکەر
دڵ وات: من شیرین شیرین جە لامەن
قسەی شەکەر پووچ، ناپوختەن، خامەن
شیرین شیرینەن چون گیان شیرین
کافر نەکێشۆ هیجران شیرین
بە غەیر جە شیرین شۆخ بۆ عەنبەر
نمەیۆم بە کار هەزار مەن شەکەر
هەرتا زیندەنان من شیرین دۆزم
من هەر پەی شۆخیی شیرین بە سۆزم
ئاخر کە خوسرەو شەهەنشای عادڵ
جە دمای دەعوای وێش و پیر دڵ
وات: یە فکر پووچ، یە دەرد سەرەن
سەبر و تەحەممول جە گشت خاستەرەن
گشت کارێ بە سەبر مگێرۆ ئارام
ئینسان هەر بە سەبر میاوۆ بە کام
پووچەن پەی زەنێ بێ تابی کەردەن
هەرکەس کە مەردەن پەی زەن نەمەردەن
مەگەر کەسێ عەقڵ نەمەندەبۆ پێش
بکەرۆ زەنێ بە هام دەوای وێش
زەن کەی جە باڵای مەرد دلێر مبۆ؟!
ئاهوو چۆن دلێر جە لای شێر مبۆ؟!
نیهایەت شیرین شۆخ نەزان حاڵ
کەردەن شیرینیی زیندەگی لێم تاڵ
پێسەشان واتەن: زەنێ نا هاڵ بۆ
چون سرکەی نا ڕەس ڕووترش و تاڵ بۆ
وەختێ مپێکیش خیشمت مخێزۆ
بەو تەور بە پیکش نە جا هۆرنێزۆ
بەڵێ یە جە عەدڵ خوسرەوی دوورەن
پەی بەعزێ کاران سەبرێ زەروورەن
هەرچەند کە شیرین فرێ سەرکەشەن
بەدخووتەر جە چەرخ بەدخووی چاو ڕەشەن
غەمزە و نەزاکەت شۆخ و شەنگیی ئەو
عیشوە و گریشمە و دڵ جە سەنگیی ئەو
بە من فراوان جەفا منمانۆ
نازش نە ڕووی دەور شمشێر مشانۆ
سەڵاح هەر ئێدەن بە غەیر جە وێمان
مەخفی بۆ، با کەس نەزانۆ پێمان