dubarh bî taqit şidin xisru cihit şîrîn
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
448 Dîtin
cewdima ke şa be çend derd ser
ce řeẍim şîrîn awerdiş şeker
dîsan giřey ’eşq şîrîn lêş taw da
tawya wêney şeker ce awda
cergiş tał ’eşq şeker řêzna
pey nuqił şîrîn şeker bêzna
ce dûrîy şîrîn migřya çun şem
çun ewza’ qews qametiş bî xem
bełê sa ’aşiq bêçarey mezłûm
ce gyan şîrîn wêş ew bî meḧrûm
biřêzîş ne dem er sed car şeker
sûdê nedaro be danay dawer
be kêş zumrey ’aşiqan pêş
«xisusaًErebî» xusrew pey şîrîn dił řêş
şeker negirten hergîz cay şîrîn
şeker xasteren ya ḧełway şîrîn?
çemen key bê guł ’enberîn mibo?
şeker bê tamen er şîrîn nebo
wextê mibo şem’ şîrîn firozan
ne mecmer çun ’ûd şeker misozan
ce şeker cew bon şîrînen xaster
şîrîn çun gyanen, cay gyanen şeker
ẍerez pey şîrîn dił çun ney nała
ama be zwan ce xusrew lała
wat: min giřey sext firozanmen
pey şêwey şîrîn şax sozanmen
sîway şîrînîy şîrîn diłber
nimeyom be kam sed kelley şeker
xusrew wat: hey dił dêwaney sermest
ye teqsîr ton yanet bo derbest!
min ta key bey tac, bey tomarewe
bey text şahî, bey ser karewe
wêney ferengîy bê pîr û kafir
mikerîm esîr şîrîn û şeker
ga maçî şîrîn şeker mibêzo
ga maçî germen teb lêş mixêzo
ga maçî şîrîn şîfay min pêşen
şîrînim ke hen şeker pey çêşen
şîrînîy şîrîn er weş mibo lêt
sa horgêr ce şehd şeker dest wêt
werne wes derem wey tewr derd ser
gahê pey şîrîn, gahê pey şeker
dił wat: min şîrîn şîrîn ce lamen
qisey şeker pûç, napuxten, xamen
şîrîn şîrînen çun gyan şîrîn
kafir nekêşo hîcran şîrîn
be ẍeyr ce şîrîn şox bo ’enber
nimeyom be kar hezar men şeker
herta zîndenan min şîrîn dozim
min her pey şoxîy şîrîn be sozim
axir ke xusrew şehenşay ’adił
ce dimay de’way wêş û pîr dił
wat: ye fikir pûç, ye derd seren
sebir û teḧemmul ce gişt xasteren
gişt karê be sebir migêro aram
însan her be sebir myawo be kam
pûçen pey zenê bê tabî kerden
herkes ke merden pey zen nemerden
meger kesê ’eqił nemendebo pêş
bikero zenê be ham deway wêş
zen key ce bałay merd dilêr mibo?!
ahû çon dilêr ce lay şêr mibo?!
nîhayet şîrîn şox nezan ḧał
kerden şîrînîy zîndegî lêm tał
pêseşan waten: zenê na hał bo
çun sirkey na řes řûtirş û tał bo
wextê mipêkîş xîşimit mixêzo
bew tewr be pîkiş ne ca hornêzo
bełê ye ce ’edił xusrewî dûren
pey be’zê karan sebrê zerûren
herçend ke şîrîn firê serkeşen
bedxûter ce çerx bedxûy çaw řeşen
ẍemze û nezaket şox û şengîy ew
’îşwe û girîşme û dił ce sengîy ew
be min firawan cefa minmano
naziş ne řûy dewr şimşêr mişano
sełaḧ her êden be ẍeyr ce wêman
mexfî bo, ba kes nezano pêman