رفتن خسرو به نخچیر و رسیدن به قصر شیرین
از کتاب:
شیرین و خوسرەو
اثر:
خانای قبادی (1704-1778)
3 دقیقه
435 مشاهده
نەققاش ئەی لەوح قورس خۆر دەستوور
بەی تەور کەرد بە موشک چین نەقش کافوور
شەوێ وێنەی عەتر توڕڕەی عەبیرین
مبەخشا بۆی خاڵ شەمامەی شیرین
پەروێز جەم بەخت کەیخوسرەو ئیقباڵ
شیرینیی شێوەی شیرین کەرد خەیاڵ
سەحەرگە ئاهووی ئاتەشین پەیکەر
دەم دا نە سەوزەی گەردوون ئەخزەر
جە شەوقش نە ڕووی دنیای بی قوسوور
موشک شەو دەرلاد گێڵا بێ کافوور
ویەرد جە نۆ چەرخ خورۆش کووسش
ڕیکاب موشەڕڕەف بی بە پابۆسش
سوپەهدارانش چون تووس نەوزەڕ
کێشاشان بەیداخ ئەژدەها پەیکەر
سا وەختێ کە شی نە پشت شەودێز
ڕووش کەرد نە سارا چون ئاهووی سەوب خێز
پیادە خانان گشت ساحێب ئەفسەر
نە ڕێکابشدا یەک مەیدان فێشتەر
بە تاج و تۆمار نوقرە و تەڵاوە
چون ڕکاو شاتر مشین بە ڕاوە
نیابێ چون ماهـ یەک هەفتەی ئەنوەر
تاج خوسرەوی کەچ نە کەللەی سەر
خورشید گرتەبێ فانیەش بە دۆش
حەڵقەی ڕیکابش کەردەبێ نە گۆش
سای شوققەی درەفش کەفتەبێ نەسەر
چون لەکەی قەتران هەور نە باڵای سەر
نە فەرقش سەواد چەتر تاج زەڕ
جە دانە و یاقووت لاڵ و گەوهەر پەڕ
منمانا نە چەم فرۆزندەتەر
جە قورس خورشید نە چەرخ ئەخزەر
سوپای سەهمناک پڕ سام سەنگین
شێران ڕۆی ڕەزم غوڕندەی جەنگیش
سەر سەنان وێنەی خەدەنگ خار سم
منیشت بە بێ لاف نە دیدەی ئەنجوم
خورۆش: دوور باش زومرەی چاوەشان
مویەرد جە سارای بەرز کەهکەشان
جە گەرد ئەسپان باد پای ڕەهـ نەوەرد
مبی سیمای سیم گەردوون پڕ جە گەرد
جەنیبە کێشان جە پانسەد فێشتەر
چەنی ویساقان شۆخ لاڵ کەمەر
زیاتەر جە تەرز تەور شاهانە
نە پێش و پەسدا مبین ڕەوانە
ئە ڕۆ جە شکۆی شەهەنشای سەرمەست
تەبەر بە دۆشان تەبەرزین بە دەست
سوپا یەک مەیدان بەڵکە زیاتەر
دوور بی جە ڕیکاب ئەو دارا ئەفسەر
بەڵێ گرتەبێن دەورش چون حەسار
کەمەر کار تەڵای سادە سی هەزار
نە کۆهەی پێڵان سەدای ڕیو کووس
مویەرد نە سەرحەد ئۆڵگەی ڕۆم و ڕووس
یەک هەزار شوتور مادەی تاووسی
چەنی یەکسەد فیل گشت مەنگەلۆسی
گشت بار پڕ جە یەشم یاقووت و ئەڵماس
جە پارچەی نەفیس، جە زەڕبەفت تاس
چەنی زەڕڕین ڕەنگ جیهاز زەڕتار
جە دمای سوپاش بەستەبین قەتار
یەکسەد و هەشتاد سەققای هونەروەر
بە ئاو گوڵاو پڕ کەردەی عەنبەر
ئاوپاش ڕووی وێش، سوپاش مکەردن
جە دەستشان جام شەربەت موەردن
چارسەد مەحمەردار سەمەن بۆی دڵبەر
پەرێش مکەردن بخوور جە عەنبەر
بە غەیر جە شاپوور ساحێب عەقڵ و هۆش
مزاناش بە کار خوسرەو لاڵ پۆش
کەس نمەزانا چێش ئارەزووشەن
تا بە کۆ مشۆ، موددەعای کۆشەن
یەک هەفتەی فێشتەر شەهەنشای لاڵ پۆش
مکەرد باز نەچیر، سەرمەست و بێ هۆش
شکار ئەفگەنان نە کۆسار و دەشت
جە عەشق شێوەی شیرین مکەرد گەشت
ئاخر بێ تاو بی نەکەرد مدارا
تەی کەرد بە تەعجیل کەش و کۆ و سارا
تێزتەر جە نەسیم وەشبۆی عەبیرین
یاوا بە نزاو پای قەسر شیرین