riftin xisru bih nixçîr û risîdin bih qisir şîrîn
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
246 Dîtin
neqqaş ey lewḧ qurs xor destûr
bey tewr kerd be muşk çîn neqiş kafûr
şewê wêney ’etir tuřřey ’ebîrîn
mibexşa boy xał şemamey şîrîn
perwêz cem bext keyxusrew îqbał
şîrînîy şêwey şîrîn kerd xeyał
seḧerge ahûy ateşîn peyker
dem da ne sewzey gerdûn exzer
ce şewqiş ne řûy dinyay bî qusûr
muşk şew derlad gêła bê kafûr
wiyerd ce no çerx xuroş kûsiş
řîkab muşeřřef bî be pabosiş
supehdaranş çun tûs newzeř
kêşaşan beydax ejdeha peyker
sa wextê ke şî ne pişt şewdêz
řûş kerd ne sara çun ahûy sewb xêz
pyade xanan gişt saḧêb efser
ne řêkabşida yek meydan fêşter
be tac û tomar nuqre û teławe
çun řikaw şatir mişîn be řawe
nyabê çun mah yek heftey enwer
tac xusrewî keç ne kelley ser
xurşîd girtebê fanyeş be doş
ḧełqey řîkabiş kerdebê ne goş
say şuqqey direfiş keftebê neser
çun lekey qetran hewr ne bałay ser
ne ferqiş sewad çetir tac zeř
ce dane û yaqût lał û gewher peř
minmana ne çem firoznideter
ce qurs xurşîd ne çerx exzer
supay sehminak piř sam sengîn
şêran řoy řezim ẍuřindey cengîş
ser senan wêney xedeng xar sim
minîşt be bê laf ne dîdey encum
xuroş: dûr baş zumrey çaweşan
muyerd ce saray berz kehkeşan
ce gerd espan bad pay řeh newerd
mibî sîmay sîm gerdûn piř ce gerd
cenîbe kêşan ce pansed fêşter
çenî wîsaqan şox lał kemer
zyater ce terz tewr şahane
ne pêş û pesda mibîn řewane
e řo ce şikoy şehenşay sermest
teber be doşan teberzîn be dest
supa yek meydan bełke zyater
dûr bî ce řîkab ew dara efser
bełê girtebên dewirş çun ḧesar
kemer kar tełay sade sî hezar
ne kohey pêłan seday řîw kûs
muyerd ne serḧed ołgey řom û řûs
yek hezar şutur madey tawwisî
çenî yeksed fîl gişt mengelosî
gişt bar piř ce yeşim yaqût û ełmas
ce parçey nefîs, ce zeřbefit tas
çenî zeřřîn řeng cîhaz zeřtar
ce dimay supaş bestebîn qetar
yeksed û heştad seqqay hunerwer
be aw guław piř kerdey ’enber
awpaş řûy wêş, supaş mikerdin
ce destişan cam şerbet mwerdin
çarsed meḧmerdar semen boy diłber
perêş mikerdin bixûr ce ’enber
be ẍeyr ce şapûr saḧêb ’eqił û hoş
mizanaş be kar xusrew lał poş
kes nimezana çêş arezûşen
ta be ko mişo, mudde’ay koşen
yek heftey fêşter şehenşay lał poş
mikerd baz neçîr, sermest û bê hoş
şikar efgenan ne kosar û deşt
ce ’eşq şêwey şîrîn mikerd geşt
axir bê taw bî nekerd midara
tey kerd be te’cîl keş û ko û sara
têzter ce nesîm weşboy ’ebîrîn
yawa be nizaw pay qesir şîrîn