riftin xisru bih qisir şîrîn û dir bistin bih rwî xisru
Li pirtûka:
Şîrîn û Xusrew
Berhema:
Xanayê Qubadî (1704-1778)
9 Xulek
454 Dîtin
seru sya poş xamey ’ebîrîn
bey tewr kerd înşay xusrew û şîrîn
wextê ke xusrew şa feřřux meqam
yawa be nezdîk qesir dilaram
yek firsextî dûr ce qesir cam řêz
peyapey derlad ne pişt şewdêz
çun şew be teqdîr ustay bała dest
peřend muşkî ne řûy cîhan best
cewdima şîddet zimistan serd
gêc badeweş ne gerdûn muyerd
midraxşa ce dûr sermay piř ce zor
serawan ce yex çun cam bilûr
feřřaşan ne cext çun çerx gerdûn
kerdişan we pa xeymey zeř sitûn
be «ḧisb alfirman» ew şay cem şiko
çend xerwar çoy ’ûd çenî sendel ço
çend bar nafey muşk dar çînî û ’enber
kokerdin ce ḧed ḧîsab zyater
be cay hême wişk perê şehryar
soçya ta wext sub bî aşkar
ew şew ce boy muşk ’ûd fumarî
seḧra mibêza nafey tatarî
herçend ce hewa kafûr miřêza
boy bixûr ne çetir şahîş mibêza
be řaḧet ta subiḧ xusrew dara
wêney sikender ew şew wiyara
çun xurşîd wêney lał bedexşan
sîmay sîm subiḧ sadiq kerd řexşan
xusrew wêş we řext xusrewî poşa
camê ce badey yaqûtî noşa
wextê ew badey tełxî noş awerd
teb’iş teqazay şehd şîrîn kerd
ne pişt şebdêz be cext bî swar
sermest û bêhoş ce badey gułnar
çenî çend ẍułam zułf bo ’ebîrîn
řûş kerd mestane be qesir şîrîn
ḧerem serayan nergis boy newxêz
řaz şerbet amêz, leb teberzed bêz
’erz kerdin xusrew çenî çend ẍułam
ha yawa we pay qesir dił aram
şîrîn êd şineft firê kerd endêş
ce ’erz û sîret nam û neng wêş
watiş bestişan qapîy ew diłber
qaym ter ce sed saxtey eskender
fermaş ta be qesir yek meydan dûrter
perê payendaz şay dara efser
ce lûley zeřbefit zemîn tełay
ce ebroy mexmeł xara û xetay
ce parçey sincab menşûr be keres
ce dêbay ełwan, ce kîmxiway etłes
wistişan ferşê şahane destûr
kerdişan ce muşk, ce ’enber bixûr
çend sînî ce sîm ce eşrefî peř
çend xwan ełwan lebaleb ce zeř
muheyya kerdin be dîde û be dił
pey şabaş ew şehenşay qabił
wêş wêney xurşîd piř şewq enwar
şî nîşt we bałay qesir zeř nîgar
horda perdeyê wêney şem’ şew
dû çem kerd be çar pey seyr xusrew
herwextê zana gerdê horêza
ew gerd tûtyay hîndî mibêza
ce gerd berama sewł newxêzê
sewzey xet bo muşk xetay bêzê
qurs řuxsarş wêney giřey nûr
midrexşa çun şem’ tecellay kwê tûr
çun xor firozan ne ferqiş efser
mukellel ce duř yaqût û gewher
destê ce nergis girtebê be dest
cew destey nergis her dû nergis mest
ce ẍurûr ’eşq, ce mestî taw taw
mama we řûşda ’ereq çu guław
xasey ẍułaman kemer şîşey zeř
xet ne dewr ḧusin wêney muşk teř
ewan hem be ’eyn syay mestewe
her yek yek destey guł be destewe
wextê şîrîn dî xusrew bew destûr
giř kefit ne cergiş çun giřey tenûr
ce neş’ey şerab şewqiş bî sermest
řoḧ û îmanş yekser şî ce dest
demê medhoş bî be dîdey nimnak
çun morey řemmał ẍełtya ne xak
axir ke cew xaw mestî bî bêdar
ḧeyran mend çun nexiş řûy sefiḧ dîwar
wat: hîçkes nîyen bibo ẍemxiwarim
nimez çon mibo ’îlac karim?!
kon danşimendê piř ’eqił hoşyar
bwazo ’uzirim ce lay şehryar
cey sebeb kerdiş sewł xatir teř
ce laley esrîn cam nergis peř
wat be dił er şa bikeron teklîf
bawero bey qesir qedem be teşrîf
ce lay xatûnan pakîzey pak dîn
mibû be serjan bê şik be yeqîn
pes mebo karê bikerûm pey wêm
duşmin baweran şadkamî pêm
êd mikerd xeyał, ce naga xusrew
yawa be qapîy «qulley» qesir ew
ḧacîban sucdey pay şewdêz berdin
sed men zeř we seng zeř weşan kerdin
perwêz cem qedir danay dił firoz
nîga kerd çun baz pey şikar be soz
dîş qapîy qulley qesir zeř nîgar
be qufił folad kerden îstîwar
ciłew horkêşa, çoge xicił mend
persaş ke şîrîn pey çêş qapî jend?
bedî çêş dyen ce ême şîrîn
bey tewr lêm besten qapîy ’ebîrîn
axir ew bê řam çêşiş menzûren
ye xo ce řewyey bizurgî dûren
tełeb kerd şexsê danay danşiwer
wat: şo be pay text şîrîn diłber
waçe bew piř xîşim ẍezeb xidê û xû
be swar midran şay dara şiko
fermanit ke qufił qapî kiryan sext
murexxez mibo beyo we pay text
yam xo her bey tewr aman ce řawe
řay wêş bigêro hey be dimawe
bełê mizano ye xeylê kesten
qapî ce mîhman hîçkes nebesten
ba řeza nebo ewend be xwarîm
şermê bikero ce şehryarîm
ne min padşay feřřux nejadim
newey newşîrwan piř ’edił û dadim?!
ḧukmim řewanter ce qezyey qezan
yend be xefetim ew pey çêş řezan?
nîyen teqsîrim be wêş mizano
’eyben yend xwarî be min minmano
waçe çi mumkîn bişû be řawe
ya buyarû zewq be řûy dinyawe
ta ke newînûn bejin bałay ew
şad nebûn be dîn xał ałay ew
er zerûşen řahî bo perwêz
ba ce bałay ey qesir cam řêz
satê seyr kerûn bałay newxêziş
dû dîdey qetran ahûy beř bêziş
herçî ke şa wat temam seranser
şineftiş şîrîn zamş bî xeter
wat be kenîzê nadîrey afaq
fiłane kuşkê piř neqiş şeş taq
temam be te’cîl guław paşî ker
piř ce muşk û ’ûd ’ebîr û ’enber
de mecmer tełay dane bend saf
çenî çend ’ûd soz sîm piř şefaf
biber perê şay sikender efser
ta ce ’etirşan caş bo mu’etter
řengîn ker be ferş ew şeş taq berz
kursîy şeş payey tawsîy xoş terz
biber hem pey şay gerdûn îḧtîşam
sucdey textiş ber, waçe fîdat bam
kenîzit ce bam qesir zeř nîgar
be cîwar canîb şay feřřux şî’ar
mîhman êmen ew be bê teklîf
be her ko maçîm bibero teşrîf
hem kenîz wêş be seř ’îziz û naz
be bîsat poşîş bikero mumtaz
ew kenîz şox nadîrey eyyam
«ḧisb alamirErebî» ew şox dił aram
esbab ew koşk bew terz temam kerd
’erz we lay cenab şay cemşîd ca berd
wat supeh salar nazk newhałan
bey tewr kerden emir şay kemer lałan
bibero teşrîf bew taq dêrîn
ta beyo şad bo be dînş şîrîn
şa ba «ḧisb alamirErebî» şîrîn diłber
qedem berd bew koşk ałay bo ’enber
wer ce wêş ew şox zerîf mehweş
çend dane yaqût gewher pey pêşkeş
çenî çend mînay bilûr bê gerd
gişt piř ce şerab çun yaqût zerd
çaşnî gîrê řexşan çun aftab
têşda muheyya şerab cullab
kyast be serkar şay dara endaz
be çend îḧtîram, be çend ’îziz û naz
cew dima xêza çun xerman genc
wêş arayş kerd be sed lar û lenc
qametiş zeř befit be řext guł bêz
řazna çun şax şimşad newxêz
best ne řûy aftab nîqab zeř tar
ce dêbay seqłab narincî û gułnar
ḧełqe kerd çun ḧey zułf ’enber bo
wistiş be pêłda zułf çenî gêsû
zeřřîn ser aẍûc amûdey gewher
be řesim çînî çun řomî mîẍfer
ce sindûqçey sîm ber awerd we ber
nya be çend naz ew ne ferq ser
şeş lûley yaqût tye nîşan lał
bend kerd beşew bend zeř tar bûm ał
tewqê mukemmel ce yaquwe zerd
mêx řêz ce daney zimřûd bê gerd
kerdiş ne gerden be sed ẍemze û naz
pexiş kerd be werda řîşeş be diłwaz
pey qezay perwêz dił xestey řencûr
qetran kerd dîdeş be surmey koy tûr
pişt best be desmał mensûc çînî
muteřřez be nexiş maway muşkînî
ce gerd ’ebîr, ce řêzey ’enber
sertapay wêş ked temam mu’etter
mu’etter ce muşk mêxek narincê
girt be destewe xêza be qincê
berama ne qesir çun ateş pare
xeraman şox şox be lence û lare
teşrîf berd we lay şay dara endaz
çenî çend ’îşwe û çend girîşme û naz
bosa pay mesend şay dara demax
cewdima xêza cełdê be gustax
goşwarey gewher řexşindey şem bêz
şendiş we pay sim şewdêz perwêz
sed dane yaqût řummanî gewher
kerdiş be nîsar ew feřřux exter
xusrew dîş şîrîn şeker leb bey terz
kerd mîhrebanî, demaxiş bî berz
nekerd îstîẍna ew gerdûn efser
dest be sînewe horêzaş ne wer
demaxiş negirt ce řutbey şahî
zuban guşad kerd ba ’uzir xwahî
fermaş cam cemîn, cemîn cam cem
dewłetit zyad, sayet nebo kem
buyero daym ne řûy ser zemîn
ferqit ce payey ey çerx dêrîn
aferîn! gişt tewr şahane pêten
bizurgî û bexşiş layq be wêten
goşwarey goşt piř bî ce gewher
midrewşa çun qurs xurşîd xawer
perê xuşnûdîy êmey xatir teng
kerdit be şabaş şewdêz şew řeng
mebleẍê xetîr hem dane û gewher
kerdit be nîsar ey bendey kemter
bełê şeker leb řast bwaçe pêm
teqsîrim çêş bî qapî bestî lêm
wêt wêney xurşîd ne çerx exzer
wistî ne bałay ey qesir bê der
řasten ke min şam, řaz řêzey şeker
bełê nîm ce to hergîz zyater
nîhayet qapî ce mîhman wêş
hîçkes nebesten neşa ne derwêş
ce lay herkesê řewşen gewheren
mîhman ’ezîzen, er sed kafren