جەفای فراوان
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
1 دقیقه
430 مشاهده
جەفای فراوان، جەفای فراوان
قیبڵەم با بەس بێ جەفای فراوان!
گەر باوەڕ ئەکەی شای شیرین خاوان
بە گیانت گیانم وە تاقەت یاوان
جە بەدبەختیی وێم جە نەحسیی تاڵەم
یەکسەر بێزارە عاڵەم جە ناڵەم
ئەجەل سەر قولاب بەستەن نە جەرگم
نمانان نەشئەی نیشانەی مەرگم
پەی پەی پەیا پەی نەفەس مشمارۆ
هیچ نەزیر نییەن ها سوب، ها ئارۆ
بەڵام وەسیەتم ئێدەن جە لای تۆ
خەیلێ عەرزم هەن وە خاک پای تۆ
دەخیل بیناییم هەر گا من مەردم
گیان فیدای بەژن و باڵای تۆ کەردم
ئاخر کۆچم کەرد پەی هەوارگەی نۆ
ئاوام کەرد ماوای سای سەرای گڵکۆ
تەخت بی بازار ئێمەیش چون یاران
بڕیا ئاموشۆی سوبح و ئێواران
مەعلووم بۆ وە لەیل ئانە قەیس مەردەن
ئارەزووی یانەی تەنیای تۆش کەردەن
سا تۆش هەی ئازیز ئاوات وازەکەم
لەیل ساحێب شەرت، شیرین ڕازەکەم
وە یاد شادیی جەی بەنەر کەردەت
بۆ وە سەرکێشیی مەجنوون مەردەت
بێ باک جە تانەی گرۆی ئەغیاران
قەدەم ڕەنجە کەر وە سەرمەزاران