ئەی گوڵڕوخی زیبایی من، قەدسەروی دڵڕوبایی من
از کتاب:
دیوانی عاجز
اثر:
عاجز (1929-1967)
2 دقیقه
805 مشاهده
ئەی گوڵڕوخی زیبایی من، قەدسەروی دڵڕوبایی من
مەلحەمی جان شیفایی من جارێ نەزەڕ کە لایی من
ڕەحمێ بکە بە بولبولان بۆ دەفعی ئازاری دڵان
تۆی غونچەیی باغی گوڵان لای دڵی بێ نەوایی من
ئەگەر لە دەست و پەنجەکەت نەختێ نەکەی کەم ڕەنجەکەت
قەسەم بە لار و لەنجەکەت زێدە دەبی سەودایی من
بە فیکری زولف و پەرچەمت دڵ کەوتە گێژاوی غەمت
دوورە لە بەزمی دەم دەمت حەبیبی پڕ جەفایی من
گەر سۆفیی و شێخ و مەلا ڕووی تو لە وەقتی ئینجلا
ببینن دەبنە بەر بەڵا وەک دڵی بەر بەڵایی من
مایەیی ژینە چاوەکەت ئافەتی دینە ناوەکەت
مەستم بە بۆی گوڵاوەکەت لوتفێ بکە لەیلایی من
هەر تۆی کە مەحبووبی منی هەر تۆی کە مەتلووبی منی
هەر تۆی کە مەڕغووبی منی لە عالەمی دونیایی من
ئەگەر بزانی حاڵەتم کە لێم بڕاوە تاقەتم
کوشتەیی یێک ئیشاڕەتم دەبی بە ئاشنایی من
ئەی شۆخی نازەنینی من ئەی مەلحەمی برینی من
غونچەیی مەهجەبینی من تۆی باعیسی سەدایی من
ناڵەو و زاری تا بەکەی فرمێسکی جاری تا بەکەی
حاشا لە یاری تابەکەی پاپایی ئەورووپایی من
بولبولی دەوری غونچەمە تووتیی پڕ لە نەغمەمە
مەجڕووحی خەدد و کوڵمەمە ویسالی تۆ دەوایی من
دەوای منە ویسالی تۆ چرای منە جەماڵی تۆ
سەفای منە خەیاڵی تۆ لەلای تووە بە قایی من
بە چاو و خەدد و گەردەنت بە پەرچەمی ملەووەنت
هەوایی شەرقی ئەردەنت وێرانی کرد بەغدایی من
غەمگین و پڕ لە داغە دڵ چاونۆڕە بێ لەو باغە گوڵ
کە چونکە شەوچراغە شل گڵۆپی کەهرەبایی من
جەفا بەسە وەفا بکە عاجزتخلص بە وەسلت شا بکە
لە غەمخۆری ڕەها بکە ئەو دڵی موبتەلایی من