چەرخ هەر ئەو چەرخەن تا ئاوەرد و بەرد

از کتاب:
دیوانی مەولەوی
اثر:
مولوی (1806-1882)
 1 دقیقه  1313 مشاهده
چەرخ هەر ئەو چەرخەن تا ئاوەرد و بەرد
دەس ئەو دەس نگین تا خاتەم ئاوەرد
دا بەزمی خوسرەو شیرین وە هەمدا
جام دا وە سەر جەم، جەم وە سەر جەمدا
شۆرەتنامەی نام حاتەمش کەرد تەی
کەرد وەکاسەکەل کاسەی کەلەی کەی
ساقی، گەردی ئارد یارانی هامفەرد
مدۆم نە دەماخ ئاسیای چەپگەرد
سەدای ئاسیاوچی مەیۆ پەیاپەی
ئاساو خاڵییەن نەوبەتەن سا دەی
هەر کاتێت زانا چەرخێ وەردەوە
چون یاران دانەی ئێمەیچ هەڕدەوە
نە هەر سەردەشتێ کشتێ کریابۆ
وە جۆی چەمەی چەم ئاو نەدریابۆ
نەیاوابۆ خاس دانەش بەو ئاوە
لایق نین بەردێش بەو ئاسیاوە
فیدات بوون ئامان سا هورکەر با بەی
وە سەر کشتمدا پەیپەی جەو جۆی مەی
ئەر سەد کشتەکەم ئاخر کارشەن
هەفتەکەی ئاخر نەو وەهارشەن
بەڵام بەڵ تەڵ تەڵ کەشێوە کەرۆ
جەی ئاخرەوە داناوێ وەرۆ
حەیفەن تۆ میراو سەرجۆی بادە بی
وە هەر کەس بە قەد کەفاف دادە بی
من کشتم ڕووزەرد هامفەردانش بۆ
دانەم ڕوو سیای هامدەردانش بۆ